قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەربايەۆ مەملەكەت باسشىسى قاسىم- جومارت توقايەۆتىڭ تاپسىرماسى بويىنشا بەلگىلى مادەنيەت جانە ونەر قايراتكەرلەرىنە قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ 2020 -جىلعى مادەنيەت سالاسىنداعى مەملەكەتتىك ستيپەندياسىن تابىس ەتتى.
مەملەكەتتىك ستيپەنديا قازاقستاننىڭ 75 ادەبيەت پەن ونەر قايراتكەرىنە تاعايىندالدى. سالتاناتتى راسىمگە قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا جانە الماتى قالاسىنىڭ اكىمى باقىتجان ساعىنتايەۆ قاتىستى. مەملەكەتتىك حاتشى اتاپ وتكەندەي، بيىلعى جىل قازاقستان تاۋەلسىزدىگىنىڭ 30 جىلدىعى اياسىندا وتەدى. دەمەك تاۋەلسىزدىكتىڭ مەرەيتويلىق جىلىنىڭ باستالۋى مەملەكەت باسشىسى ق. ق. توقايەۆتىڭ «تاۋەلسىزدىك بارىنەن قىمبات» اتتى باعدارلامالىق ماقالاسىنىڭ جارىققا شىعۋىمەن ەرەكشەلەندى.
ەل پرەزيدەنتىنىڭ ماقالاسىندا تاۋەلسىزدىكتىڭ ءار ونجىلدىعىنىڭ تاريحي ءمانى، ىرگەلى باستامالارى مەن تۇڭعىش پرەزيدەنت - ەلباسى ن. ءا. نازاربايەۆتىڭ شەشۋشى ءرولى، قازاق مەملەكەتتىلىگىن قالىپتاستىرۋداعى حالقىمىزدىڭ دانالىعى مەن بىرلىگى، ەڭبەكقورلىعى ايقىن جازىلعان.
مەملەكەت باسشىسى تاۋەلسىزدىگىمىزدىڭ قاسيەتتى قۇندىلىقتارى تۋرالى زاماناۋي تۇسىنىكتى تەرەڭ ءارى اۋقىمدى تۇردە اشىپ، الداعى ءتورتىنشى ونجىلدىقتىڭ باستى ماقساتتارىن ايقىندادى. قىرىمبەك كوشەربايەۆ ءبىزدىڭ قوعام پرەزيدەنتتىڭ ماقالاسىن مەملەكەتىمىزدىڭ دامۋىنداعى جاڭا كەزەڭنىڭ يدەولوگيالىق تۇجىرىمداماسى جانە باعدارلاماسى رەتىندە قابىلداعانىن باسا ايتتى.
ماسەلەن، پرەزيدەنتتىڭ حالقىمىزدىڭ سان عاسىرلىق شىنايى تاريحىن، ونىڭ ىشىندە شەتەلدىك اۋديتورياعا قازاقستاننىڭ قىسقا تاريحىن جازىپ، الەمنىڭ نەگىزگى تىلدەرىنە اۋدارۋ تۋرالى باستاماسى شىن مانىندە دە ستراتەگيالىق ماڭىزدى ماسەلە. سوندىقتان قازاق زيالىلارىنا ۇلتتىق مۇددەلەر مەن جاڭا عىلىمي تاسىلدەردى ەسكەرە وتىرىپ، ءوز تاريحىن زەردەلەۋ، پاندەميانىڭ، جاھاندىق داعدارىستىڭ جانە ساياسي تۋربۋلەنتتىلىكتىڭ قازىرگى جاعدايىندا قوعام دامۋىنىڭ ولشەمدەرىن ايقىنداۋ بويىنشا وراسان زور جۇمىس جۇرگىزۋ مىندەتى قويىلدى.
مەملەكەتتىك حاتشى سونىمەن بىرگە مەملەكەتتىك قولداۋ ەلىمىزدىڭ رۋحاني نەگىزدەرىن ودان ءارى نىعايتۋعا، قوعامدىق سانانى جاڭعىرتۋعا جانە تاۋەلسىزدىگىمىزدىڭ قاسيەتتى قۇندىلىقتارىن ناسيحاتتاۋعا مۇمكىندىك بەرەتىن جاڭا يدەيالار مەن جوبالاردى ىزدەۋگە تىڭ سەرپىن بەرەتىنىنە سەنىم ءبىلدىردى.
قازاقستان رەسپۋبليكاسىنىڭ تۇڭعىش پرەزيدەنتى - ەلباسى ستيپەندياسى ءابدىجامىل نۇرپەيىسوۆ، اسانالى ءاشىموۆ، نۇرعالي ءنۇسىپجانوۆ، الەكساندر گاركوۆەتس، دۋلات يسابەكوۆ، يرانبەك ورازبايەۆ، بولات ايۋحانوۆ، گۋلۆيرا رازيەۆا جانە باسقا دا قازاق ادەبيەتى مەن ونەرىنىڭ مايتالماندارىنا تابىستالدى.
سونىمەن بىرگە، اقىندار باۋىرجان حاليوللا، ميراس اسان، بالەرينا اسەل جانعاسقايەۆا، اكتەر ايان وتەپبەرگەن، ونەرتانۋشى ۆالەريا نەدلينا جانە وزگە دە جاس دارىندارعا مەملەكەتتىك قولداۋ كورسەتىلدى.