«بىرىنشىدەن، «قاراپايىم زاتتار ەكونوميكاسى» جوبالارىن ودان ءارى ءتيىمدى ىسكە اسىرۋ ءۇشىن جاڭا شارالار قاجەت، سونىڭ ىشىندە مەملەكەت تاراپىنان كەپىلدىكتى ۇلعايتۋ قاجەت. سوندىقتان ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن جانە ۇيىمدارمەن بىرلەسىپ، ءبىر اي مەرزىمدە جەڭىلدەتىلگەن كرەديت بەرۋ باعدارلاماسىنا تۇزەتۋلەردىڭ جەتىنشى پاكەتىن ازىرلەۋدى تاپسىرامىن. ەكىنشىدەن، باعدارلامانىڭ بارلىق ماقۇلدانعان جوبالارىنىڭ ۋاقىتىلى ىسكە قوسىلۋىن قامتاماسىز ەتۋ قاجەت. بۇل ورايدا الماتى قالاسى، جامبىل وبلىسى جانە قوستاناي وبلىسى وڭ مىسال بولا الادى. ال قىزىلوردا جانە اتىراۋ وبلىستارىندا كوپتەگەن ماقۇلدانعان جوبالار ءالى كۇنگە دەيىن سۋبسيديا بەرىلمەگەن، اتالعان وبلىستاردا جوبالاردىڭ سوماسى مەن سانى بويىنشا ەڭ تومەن ءوسىم بايقالادى. وسىعان بايلانىستى اكىمدىكتەرگە ماقۇلدانعان جوبالار ىسكە اسىرىلعانشا ولاردى جەدەل قولداۋدى قامتاماسىز ەتۋ شارالارى قابىلدانسىن»، - دەدى اسقار مامين ۇكىمەتتىڭ بۇگىنگى وتىرىسىندا.
ءۇشىنشى، اكىمدىكتەرگە ەكونوميكا سالالارىنداعى جەرگىلىكتى قامتۋ ۇلەسىنىڭ ماقساتتى كورسەتكىشتەرىنە قول جەتكىزىپ قانا قويماي، ولاردىڭ بەلسەندى ءوسۋىن قامتاماسىز ەتۋ تاپسىرىلدى. ول ءۇشىن پرەمەردىڭ ايتۋىنشا، جەرگىلىكتى قامتۋدى باقىلاۋ جونىندەگى وڭىرلىك كوميسسيالار الاڭىن ءتيىمدى جۇمىلدىرىپ، وڭىرلىك بيزنەس پەن ماڭىزدى تاپسىرىس بەرۋشىلەردى تارتۋ كەرەك.
«ءتورتىنشى، جىل سايىن شامامەن 7 تريلليون تەڭگەنى قۇرايتىن جەر قويناۋىن پايدالانۋشىلاردىڭ ساتىپ الۋىندا دا ماڭىزدى الەۋەت بار. حالىقارالىق تاجىريبەدەن بايقاعانىمىز، وتاندىق تاۋار وندىرۋشىلەردى قولداۋ ءۇشىن جەر قويناۋىن پايدالانۋشىلاردىڭ جەرگىلىكتى قامتۋ بويىنشا ەرىكتى مىندەتتەمەلەردى قابىلداۋى بولىگىندە كەلىسىمدەر جاسالادى. وسىعان بايلانىستى يندۋستريا جانە ينفراقۇرىلىمدىق دامۋ، ەنەرگەتيكا مينيسترلىكتەرى جەر قويناۋىن پايدالانۋشىلارمەن وسىنداي كەلىسىمدەر جاساسۋ بولىگىندە زاڭنامالىق تۇزەتۋلەر ازىرلەسىن. بەسىنشى، ازىرلەنگەن وڭىرلەردىڭ ەكونوميكالىق كارتاسى وڭىرلەردى دامىتۋدىڭ بارلىق نەگىزگى كورسەتكىشتەرىن بىرىكتىرۋگە، ولاردى ساپالى مونيتورينگتەۋدى قامتاماسىز ەتىپ، جەدەل شەشىمدەر قابىلداۋعا مۇمكىندىك بەرەدى. وسىعان بايلانىستى ۇلتتىق پالاتا ۇسىنعان وڭىرلەردىڭ ەكونوميكالىق كارتاسىن قالىپتاستىرۋ ءتارتىبىن ماقۇلداۋعا بولادى دەپ ەسەپتەيمىن. رومان ۆاسيليەۆيچ (ق ر پرەمەر- ءمينيسترىنىڭ ورىنباسارى رومان سكليار - رەد.)، باقىلاۋ وزىڭىزدە»، - دەدى ۇكىمەت باسشىسى.
قورىتىندىلاي كەلە اسقار مامين «قاراپايىم زاتتار ەكونوميكاسى» باعدارلاماسىن ىسكە اسىرۋ جانە جەرگىلىكتى قامتۋدى دامىتۋ ماسەلەلەرى كەلەسى جىلدىڭ باسىندا مەملەكەت باسشىسىنىڭ توراعالىعىمەن وتەتىن كەڭەيتىلگەن وتىرىستا قارالاتىنىن اتاپ ءوتتى. بۇعان دەيىن پرەمەر- مينيستر «قاراپايىم زاتتار ەكونوميكاسى» جوبالارىنىڭ سانى 900 دەن 2600 گە دەيىن 2,5 ەسە ارتقانىن بايانداعان ەدى.