جوعارى ەۋرازيالىق ەكونوميكالىق كەڭەستىڭ وتىرىسىندا ەلباسى، جەەك قۇرمەتتى ءتوراعاسى نۇرسۇلتان نازاربايەۆ وسىلاي ءمالىم ەتتى، دەپ حابارلايدى قازاقپارات ءتىلشىسى.
«ءبىزدىڭ جۇمىستى كەلەسى باعىتتا جالعاستىرۋ كەرەك دەپ ەسەپتەيمىن: بىرىنشىدەن، ءبىز ءبىزدىڭ مەملەكەتتەردىڭ ونەركاسىپتىك الەۋەتىنىڭ ينتەگراتسيالىق قارقىنىن ۇدەتۋ كەرەك. بۇگىنگى تاڭدا شيكىزاتقا جاتپايتىن تاۋارلاردىڭ كولەمى ءوزارا تاۋار اينالىمىندا بار- جوعى 16 پايىزدى قۇرايدى. بۇل وتە از. بۇل باعىتتاعى قادام باسەكەگە قابىلەتتى باسىمدىقتاردىڭ سپەكترىن قامتاماسىز ەتەدى»، - دەدى نۇرسۇلتان نازاربايەۆ وتىرىستا.
ەلباسى ەكىنشىدەن ەكونوميكالىق وداققا مۇشە مەملەكەتتەر ساۋدا اعىمىنىڭ بەكەمدىگىن قامتاماسىز ەتۋى كەرەكتىگىن ايتتى.
«ءوزارا ساۋدانىڭ الەۋەتى وكىنىشكە قاراي ءالى ءوزىن كورسەتە العان جوق. بۇل ءبىزدىڭ باستى مىندەتىمىز بولۋى كەرەك. نەگىزىندە ءبىز باسقا مەملەكەتتەردەن كەلگەن يمپورتتىق تاۋارلاردى ءوز تاۋارلارىمىزبەن اۋىستىرۋىمىز كەرەك. سالىستىرىپ ايتسام، ەۋروپا وداعى، وشاەس سەكىلدى باسقا وداقتاردا بۇل كورسەتكىش 63 پايىزدى، 45 پايىزدى قۇرايدى. ال بىزدە بۇل كورسەتكىشتىڭ كولەمى بار- جوعى 9 پايىز عانا. ۇشىنشىدەن، الەمدىك تسيفرلىق نارىقتاعى تەڭدەسسىز وزگەرىستەردىڭ كۋاسى بولىپ وتىرمىز. IT - يندۋستريا - وسى جىلدىڭ باستى بەنەفەتسيارى بولدى. پاندەميا تسيفرلىق ترانسفورماتسيانى جەدەلدەتىپ جىبەردى. بيزنەس جۇرگىزۋدىڭ ءداستۇرلى امالدارىن وزگەرتتى، الەۋمەتتىك سالانى، ەكونوميكانى راديكالدى تۇرعىدا وزگەرتتى. ە ا ە و - ديدجيتيليزاتسياسى بەلسەندى بىرلەستىككە اينالۋى ءتيىس»، - دەدى ول.