«وڭىرلەرگە ساپار اياسىندا جەزقازعان قالاسىندا بولىپ، وسىنداعى ءىرى كاسىپورىن - «Kazakhmys Smelting» مىس قورىتۋ زاۋىتىنىڭ قىزمەتكەرلەرىمەن كەزدەستىم. وندىرىستە ەڭبەك قۇقىعىنىڭ ساقتالۋى، جاڭا جۇمىس ورىندارىن اشۋ، جالپى قالانىڭ دامۋى تۋرالى ماسەلەلەردى تالقىلاپ، وي بولىستىك. فيليال باسشىلىعىنىڭ ايتۋىنشا، پاندەميا جاعدايىندا ءوڭىر ەكونوميكاسى قالىپتى كۇيدە ۇستالىپ، قىزمەتكەرلەردىڭ جاپپاي جۇمىستان بوساتىلۋىنا، جاستار جۇمىسسىزدىعىنىڭ وسۋىنە جول بەرىلمەگەن. ايتسە دە، COVID-19-عا بايلانىستى احۋال ەڭبەك نارىعىنا ءوز اسەرىن تيگىزبەي قويمادى. تۋريزم، مادەنيەت، سپورت، قوعامدىق تاماقتانۋ، كولىك جانە تاعى باسقا سالالار زارداپ شەكتى» دەپ جازادى باۋىرجان بايبەك Facebook پاراقشاسىندا.
پارتيا ءتوراعاسى ورىنباسارىنىڭ ايتۋىنشا، جاڭا سىن- قاتەرلەردى ەسكەرە وتىرىپ، «نۇر وتان» پارتياسى ەڭبەك نارىعىنىڭ سۇرانىسىن ەسكەرە كەلە، جاڭا تۇراقتى جۇمىس ورىندارىن اشۋ، كادرلاردى قايتا دايارلاۋ بويىنشا كەشەندى شارالاردى قولعا الادى. بۇل رەتتە وتاندىق وندىرۋشىلەرگە قولداۋ كورسەتۋگە، باسەكەگە قابىلەتتى جانە يمپورتتى الماستىراتىن ونىمدەر شىعاراتىن جاڭا ءوندىرىس ورىندارىن اشۋعا باسىمدىق بەرىلەدى.
«بۇل مىندەتتەر ءبىزدىڭ جەزقازعان قالاسى بويىنشا قالالىق سايلاۋالدى باعدارلامامىزدا قامتىلعان. ول قاراشا ايىندا حالىقپەن كەڭىنەن تالقىلاۋ نەگىزىندە قابىلدانعان بولاتىن. سونىمەن قاتار جاڭا مودۋلدى ينفەكسيالىق كلينيكادا قالانىڭ مەديتسينا قىزمەتكەرلەرىمەن كەزدەستىم. دەنساۋلىق ساقتاۋ سالاسىنداعى تۇيتكىلدى ماسەلەلەردى تىڭدادىم. ولاردىڭ باسىم بولىگى وڭىرلىك سايلاۋالدى باعدارلامانى ىسكە اسىرۋ اياسىندا ءوز شەشىمىن تابادى. بۇلاردىڭ قاتارىندا قالالىق كوپ بەيىندى اۋرۋحاناعا كۇردەلى جوندەۋ جۇرگىزۋ، جاس دارىگەرلەرگە ارنالعان جاتاقحانا جانە باسقا ماسەلەلەر بار. بۇدان كەيىن ءوڭىردىڭ جاس بەلسەندىلەرىمەن كەزدەسۋ وتكىزدىم.
ولاردىڭ كوپشىلىگى «نۇر وتان» - نىڭ وڭىرلىك پرايمەريزىندە جەڭىمپاز بولىپ، قالالىق ءماسليحات سايلاۋىنا ارنالعان پارتيالىق تىزىمگە ەنگەن. جالپى، جەزقازعان بويىنشا پارتيالىق ءتىزىم 60 پايىزعا جاڭارسا، ونداعى جاستاردىڭ ۇلەس سانى 0-دەن 23 پايىزعا ءوستى» دەپ مالىمدەدى پارتيا باسشىسى.
باۋىرجان بايبەك وڭىرگە ساپار بارىسىندا ۇلىتاۋ اۋدانىندا دا بولدى. ەلباسى، پارتيا ليدەرى ن. ءا. نازاربايەۆ ەرەكشە اتاپ كورسەتكەندەي، ۇلىتاۋ - قازاق حالقىنىڭ قاسيەتتى ءوڭىرى. سوندىقتان تاريحي مۇرانى ساقتاۋ جانە ەلىمىزدىڭ اۋماعى جاعىنان ەڭ ءىرى اۋدانىن ارى قاراي دامىتۋ الداعى 5 جىلعا ارنالعان پارتيالىق مىندەتتەردە كورىنىس تاپقان. «مەملەكەت باسشىسى ق. ك. توقايەۆ وڭىرگە جاساعان ساپارلارىنىڭ بىرىندە «ۇلىتاۋ - حالىقارالىق دەڭگەيدەگى ەتنوگرافيالىق تۋريزمنىڭ ورتالىعى بولۋى ءتيىس»، - دەپ اتاپ كورسەتكەن بولاتىن.
بۇگىندە مۇندا ءبىرقاتار جاڭا نىساندار بوي كوتەرىپ، ۆيزيت- ورتالىق پەن ستاديون سالىنعان، بىرنەشە ساياباق پەن اللەيا اباتتاندىرىلعان. ولكە تانۋ مۋزەيىنىڭ، يپپودروم مەن قوناق ۇيلەر قۇرىلىسى ءجۇرىپ جاتىر. سونىمەن بىرگە، ەلىمىزدىڭ ورتا عاسىرلىق ارحيتەكتۋرالىق ەسكەرتكىشتەرىنىڭ ءبىرى - جوشى حان كەسەنەسىنىڭ رەكونسترۋكسياسىمەن تانىستىم. التىن وردانىڭ 750 جىلدىعى اياسىندا تاريحي- مادەني كەشەننىڭ قۇرىلىسى جۇرگىزىلۋدە. ونى كەلەسى جىلدىڭ جەلتوقسان ايىندا اشۋ جوسپارلانىپ وتىر. بۇل كەشەن دە تۋريستەردى قىزىقتىراتىن تاعى ءبىر عاجايىپ ورىنعا اينالاتىنىنا سەنىمدىمىن» دەپ تۇيىندەدى باۋىرجان بايبەك.