كوشەربايەۆ ساياسي قۋعىن- سۇرگىن قۇرباندارىن اقتاۋ جونىندەگى كوميسسيانىڭ باستى مىندەتىن اتادى

نۇر- سۇلتان. قازاقپارات - ساياسي قۋعىن- سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ ماقساتى - ورنىقتى شەشىم قابىلداپ، تاريحي ادىلەتتىلىكتى قالپىنا كەلتىرۋ جولىنداعى جوعارى كاسىبيلىك پەن ادىلدىككە قالتقىسىز قىزمەت ەتۋ.

مەملەكەتتىك كوميسسيانىڭ العاشقى وتىرىسىندا ق ر مەملەكەتتىك حاتشىسى قىرىمبەك كوشەربايەۆ وسىلاي دەدى، دەپ حابارلايدى قازاقپارات ءتىلشىسى.

«وزدەرىڭىز بەلگىلى، تاۋەلسىزدىكتىڭ العاشقى ارايلى تاڭىنان باستاپ ءبىز ءوز تاريحىمىزعا جاڭاشا قاراپ، ەلدىڭ وتكەنىن زەردەلەپ، ەلەكتەن وتكىزۋگە بەت بۇرىپ كەلەمىز. سول جاۋاپتى ىستە ەلباسى نۇرسۇلتان ءابىش ۇلى نازاربايەۆتىڭ تىكەلەي باستاماسىمەن 1993 - جىلعى ساۋىردە قابىلدانعان ساياسي قۋعىن- سۇرگىن قۇرباندارىن جاپپاي اقتاۋ تۋرالى ق ر زاڭى ىقپالدى نورماتيۆتى تەتىككە اينالدى. جاقىندا جازىقسىز ايىپتالعانداردى اقتاۋدىڭ جاڭا كەزەڭىنىڭ قۇقىقتىق قۇجاتى قابىلدانىپ، مەملەكەت باسشىسى قاسىم- جومارت كەمەل ۇلى توقايەۆتىڭ ساياسي قۋعىن- سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيا تۋرالى جارلىعى جارىققا شىقتى. ەندىگى جەردە الدىمىزدا اسا اۋقىمدى مىندەتتەر، كۇرمەۋى شەشۋدى قاجەت ەتەتىن كۇردەلى تاريحي ماسەلەلەر تۇر»، - دەدى قىرىمبەك كوشەربايەۆ مەملەكەتتىك كوميسسيانىڭ وتىرىسىندا.

مەملەكەتتىك حاتشى وسى رەتتە بۇل ىسكە كوميسسيا مۇشەلەرىن بارىنشا بايىپپەن قاراۋدى سۇرادى. «مەملەكەتتىك كوميسسيا ەموتسياعا بەرىلىپ، داۋ- دامايعا جول بەرەتىن ديسكۋسسيا الاڭى ەمەس. ءبىزدىڭ ماقساتىمىز - ورنىقتى شەشىم قابىلداپ، تاريحي ادىلەتتىلىكتى قالپىنا كەلتىرۋ جولىنداعى جوعارى كاسىبيلىك پەن ادىلدىككە قالتقىسىز قىزمەت ەتۋ ەكەنىن ەستەرىڭىزگە سالامىن»، - دەدى مەملەكەتتىك حاتشىسى.

قىرىمبەك كوشەربايەۆ مەملەكەت باسشىسى قاسىم- جومارت توقايەۆتىڭ بيىل ساياسي قۋعىن- سۇرگىن جانە اشارشىلىق قۇرباندارىن ەسكە الۋ كۇنىنە وراي جاساعان ۇندەۋىندە ⅩⅩ عاسىردىڭ 20-50 -جىلدارىنداعى ساياسي قۋعىن- سۇرگىن زوبالاڭى حالقىمىزدىڭ تاريحىنداعى قاسىرەتتى كەزەڭ ەكەنىن اتاپ ءوتىپ، تاريحي ادىلدىكتى قالپىنا كەلتىرۋ جۇمىستارىن اياقتاپ، ساياسي قۋعىن- سۇرگىن قۇرباندارىن اقتاۋ ءۇشىن ارنايى مەملەكەتتىك كوميسسيا قۇرۋدى تاپسىرعانىن ەسكە سالدى.

«مىنە، اتالعان تاريحي ميسسيانى اتقارۋ مىندەتى وسىندا وتىرعان بارشامىزعا جۇكتەلىپ وتىر. بۇل مىندەتتى ءبىز جازىقسىز جاپا شەككەندەردىڭ رۋحىنا تاعزىم ەتۋ ءۇشىن جانە جاس ۇرپاقتى جاڭا جاسامپاز سانامەن تاربيەلەۋ ءۇشىن ورىنداۋىمىز قاجەت. البەتتە، سول زامانداعى سولاقاي ساياساتتىڭ سالدارىنان بولعان ساياسي قۋعىن- سۇرگىننىڭ زارداپتارىن كەڭەس وداعىنداعى بارشا حالىقتاردىڭ تارتقانى اقيقات. دەسەك تە ءوزىنىڭ تاعدىر- تالايىندا مىڭ ءولىپ، مىڭ تىرىلگەن حالقىمىزدىڭ ⅩⅩ عاسىردىڭ العاشقى جارتىسىندا كورگەن ازابى مەن قاسىرەتىن سوزبەن ايتىپ جەتكىزۋ قيىن ەكەنى بەلگىلى. وتكەن ءجۇزجىلدىقتىڭ 20-30 -جىلدارىنداعى كۇشتەپ ۇجىمداستىرۋ، تاركىلەۋ ۇلتىمىزدىڭ عاسىرلار بويى ورنىققان ءومىر سالتىن بۇزۋ ارەكەتتەرى قازاق حالقىنىڭ قىناداي قىرىلۋىنا اكەپ سوقتىرعانى اشى شىندىق. سونداي سوراقى ارەكەتتەرگە شىداماي، ازاماتتىق قۇقىعىن تالاپ ەتىپ اتقا قونعان قازاقتاردىڭ 372-گە جۋىق باس كوتەرۋىنە دە بۇرىندارى ءبىر جاقتى باعا بەرىلگەنى بەلگىلى. ۇلتىمىزدى وركەنيەت كوشىنە قوسۋعا ۇمتىلعان الاش ارىستارىن قۋعىنعا تۇسىرگەن 1937 -جىلدىڭ ساياسي ناۋقانى جۇرتشىلىقتىڭ ءالى دە جادىندا تۇر»، - دەدى قىرىمبەك كوشەربايەۆ.

اۆتور: ايان بەكەن ۇلى