رەسەي فەدەراتسياسىنىڭ توراعالىعىمەن ۆيدەوكونفەرەنسيا فورماتىندا ءوتىپ جاتقان ۇجىمدىق قاۋىپسىزدىك شارت ۇيىمى ۇجىمدىق قاۋىپسىزدىك كەڭەسىنىڭ سەسسياسىنا پارلامەنتتىڭ تومەنگى پالاتاسىنىڭ سايلاۋى تۋرالى مەملەكەت باسشىسى قاسىم- جومارت توقايەۆ وسىلاي دەدى، دەپ حابارلايدى قازاقپارات ءتىلشىسى.
« COVID-19پاندەمياسى الەمدىك ساياسات پەن ەكونوميكانى شاتقاياقتاتىپ جىبەردى. جاعدايدى ساۋدا سوعىستارىنا ۇلاسقان ءوزارا سانكسيالار مەن شەكتەۋلەر ءتىپتى ۋشىقتىرىپ تۇر. ەكسترەميزم، تەرروريزم، ەسىرتكى ساۋداسى، كيبەرقاۋىپسىزدىك پەن زاڭسىز كوشى- قون سالاسىنداعى جاھاندىق تەگەۋرىندەردىڭ ارتىپ بارا جاتقانى دا الاڭداتادى. وسىنداي جاعدايدا بەيبىتشىلىكتى نىعايتىپ، ايماقتاعى قاۋىپسىزدىك پەن تۇراقتىلىقتى قامتاماسىز ەتۋ جولىنداعى مەملەكەتارالىق مەحانيزم رەتىندەگى ءبىزدىڭ ۇيىمنىڭ ءرولى ايتارلىقتاي ارتا تۇسەدى. وسى مۇمكىندىكتى پايدالانا وتىرىپ، پاندەميانى ەڭسەرۋگە ءۇن قوسقانىڭىز ءۇشىن قۇرمەتتى ۆلاديمير ۆلاديميروۆيچ (ر ف پرەزيدەنتى پۋتينگە) سىزگە العىسىمدى ايتقىم كەلەدى. تاياۋ ارادا قازاقستاندا رەسەيلىك ۆاكسينانى ازىرلەيتىن زاۋىت سالىنادى»، - دەدى قاسىم- جومارت توقايەۆ سەسسيادا.
پرەزيدەنت سونىمەن قاتار سەسسياعا قاتىسۋشىلارعا قازاقستاندا ەلەكتورالدى كەزەڭ باستالىپ جاتقانىن ايتىپ ءوتتى.
«2021 -جىلعى 11 - قاڭتاردا پارلامەنتتىڭ تومەنگى پالاتاسى مەن جەرگىلىكتى وكىلدىك ورگاندارىنىڭ سايلاۋى وتەدى. سايلاۋ كونستيتۋتسيالىق مەرزىمدە بولادى. پارتيالاردىڭ بارىنە دايارلانۋعا جەتكىلىكتى ۋاقىت بەرىلدى. بيىل ءبىز تەڭدەسسىز دەموكراتيالىق رەفورمالار پاكەتىن قابىلدادىق. ولار كوپ پارتيالىلىقتى جانە پارتيالىق باسەكەلەستىكتى دامىتۋعا، ازاماتتىق بەلسەندىلىكتى ارتتىرۋعا باعىتتالعان. اتاپ ايتقاندا زاڭنامالىق دەڭگەيدە پارلامەنتتىك وپپوزيتسيا ينستيتۋتى بەكىتىلىپ، پارتيالىق تىزىمگە جاستار مەن ايەلدەردىڭ ۇلەسى ءۇشىن 30 پايىزدىق كۆوتا ءبولىندى. ءبىز اشىق ءارى ادىلەتتى سايلاۋ وتكىزۋگە نيەتتىمىز. سەرىكتەستەرىمىزدىڭ قولداۋى مەن وسى ەلدەردىڭ باقىلاۋشىلارىن كۇتەمىز»، - دەدى قاسىم- جومارت توقايەۆ.
اۆتور: ايان بەكەن ۇلى