بۇل تۋرالى ق ر پرەزيدەنتىنىڭ باسپا ءسوز حاتشىسى بەرىك ءۋالي Facebook-تەگى پاراقشاسىندا جازدى.
«پرەزيدەنت قاسىم-جومارت توقايەۆ الماتى قالاسى تولە بي كوشەسىندەگى اعاشتاردىڭ وتالعانىنا قاتىستى جاعدايعا نازار اۋداردى. الماتى قالاسىنىڭ اكىمى باقىتجان ساعىنتايەۆقا اتالعان جاعدايعا بايلانىستى قىزمەتتىك تەركسەرۋ جۇرگىزىپ، كىنالىلەردى جاۋاپكەرشىلىككە تارتۋدى تاپسىردى. مەملەكەت باسشىسى 2019 -جىلى 29-قازاندا الماتىدا قالا پروبلەمالارىنا ارنالعان كەڭەستە سويلەگەن سوزىندە مەگاپوليستىڭ ەكوجۇيەسىنە ۇقىپتى قاراۋدىڭ، شاھار تۇرعىندارىنىڭ جايلى ءومىر ءسۇرۋىن قامتاماسىز ەتۋ ءۇشىن ءتيىستى جاعدايلار جاساۋدىڭ ەرەكشە ماڭىزدى ەكەنىن ءمالىم ەتكەن بولاتىن»، دەلىنگەن حابارلامادا.
ەسكە سالا كەتسەك، 23-قاراشادا تۇندە الماتىدا ساۋدا ءۇيىنىڭ جانىنداعى جايقالعان ەمەن مەن قاراعاش وتالدى. بۇل تۋرالى تۇرعىندار الەۋمەتتىك جەلىدە نارازىلىق ءبىلدىردى.
«قازىر اۋدان اكىمدىگى مەن پوليتسيا دەپارتامەنتى كەسىلگەن اعاشتاردىڭ تۇقىمى مەن ساپاسىن انىقتاۋ ءۇشىن وقيعا ورنىندا جۇمىس ىستەپ جاتىر. ايىپتى تۇلعالار انىقتالعان سوڭ پوليتسيا دەپارتامەنتى ولاردى جاۋاپكەرشىلىككە تارتادى. تولىعىراق اقپاراتتى انىقتاۋ جۇمىستارى اياقتالعان سوڭ جاريالايمىز»، - دەپ ءمالىم ەتتى قالا اكىمدىگى. كەيىن الماتى قالالىق جاسىل ەكونوميكا باسقارماسى ساۋدا ءۇيىنىڭ الدىنداعى اعاشتاردىڭ جاپپاي كەسىلۋىنىڭ ءمان-جايىن انىقتادى.