ەلوردانىڭ دامۋىنا الداعى ءۇش جىلدا قانشا قارجى جۇمسالادى

ءماسليحات دەپۋتاتتارى قالانىڭ قۇرىلىس، ەكولوگيا، كولىك، ساۋدا جانە ت ك ش باعىتىندا قاراجات ءبولۋدى قاراستىردى، دەپ حابارلايدى قازاقپارات ءتىلشىسى.

«ءۇش جىلدىق بيۋدجەتتىڭ پارامەترلەرى اعىمداعى جاعدايدى ەسكەرە وتىرىپ قالىپتاستىرىلدى، ياعني بولجامدى ينديكاتورلاردىڭ تۇزەتىلۋى نازارعا الىندى»، - دەدى قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقارايەۆ تۇراقتى كوميسسيانىڭ وتىرىسىندا. وسى ورايدا ول بيۋدجەت كىرىستەرى تۋرالى جەكە توقتالدى.

«2021-2023 -جىلدارى جەتكىزىلگەن ليميتتەرگە سايكەس، جەكە كىرىستەردىڭ ءتۇسىمى 1 تريلليون 1 ميلليارد 376 ميلليون تەڭگەنى قۇرايدى. ونىڭ ىشىندە 2021 -جىلى 319,7 ميلليارد تەڭگە، 2022 -جىلى - 332,2 ميلليارد جانە 2023 -جىلى - 349,3 ميلليارد تەڭگە. 2021 -جىلى جەكە كىرىس كولەمى 319,7 ميلليارد تەڭگە سوماسىندا باعالانىپ وتىر، بۇل تۇرعىدا 5 پايىز ءوسىم قامتىلدى. ونىڭ ىشىندە سالىقتىق تۇسىمدەر 315,9 ميلليارد تەڭگە، سالىقتىق ەمەس تۇسىمدەر 1,1 ميلليارد تەڭگە، سونداي- اق نەگىزگى كاپيتالدى ساتۋدان كەلەتىن ءتۇسىم 2,7 ميلليارد تەڭگە. الداعى ءۇش جىلدا سالىقتىق تۇسىمدەر ەلوردانىڭ جەكە كىرىستەرىنىڭ جالپى كولەمىنەن 98 پايىزعا جۋىعىن قامتاماسىز ەتەدى»، - دەدى قايسار مانقارايەۆ.

ونىڭ ايتۋىنشا، جەرگىلىكتى ءۇش جىلدىق بيۋدجەتتىڭ شىعىستارى 1 تريلليون 1 ميلليارد 376 ميلليون تەڭگە سوماسىندا جوسپارلانعان. سايكەسىنشە، ونىڭ ىشىندە 2021 -جىلى 319,7 ميلليارد تەڭگە، 2022 -جىلى - 332,2 ميلليارد، 2023 -جىلى 349,3 ميلليارد تەڭگە جۇمسالماق.

اۆتور: رۋسلان عابباسوۆ