بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ مالىمدەدى، دەپ حابارلايدى قازاقپارات.
«وتكەن جولعى مالىمەتتەرگە سۇيەنىپ، 42500 تەڭگەنى نەگە تولەي سالمايسىزدار؟» دەگەن سۇراق قويىلىپ جاتىر. ءيا، بىزدە بۇكىل مالىمەت بار. ءبىراق، بۇگىنگى شەكتەۋلەر تج قاراعاندا جەڭىلدەۋ جانە ءار وڭىردە ءار سانيتارلىق دارىگەردىڭ شەكتەۋلەرى وزگەشە. كوپ قۇرىلىس نىساندارى، قىزمەت كورسەتۋ سالالارى جۇمىس ىستەپ جاتىر. ونىڭ ۇستىنە وتكەن جولى ءوتىنىم بەرمەگەن كىسىلەر بۇل جولى اقىسىز دەمالىسقا كەتۋى مۇمكىن. سوندىقتان، قايتادان ءوتىنىش بەرىلۋى ءتيىس»، - دەپ اتاپ ءوتتى مينيستر ورتالىق كوممۋنيكاتسيالار قىزمەتىندە وتكەن بريفينگتە.
دەگەنمەن، مينيسترلىك جاردەماقىنى پرواكتيۆتى فورماتتا تاعايىنداۋدى قاراستىرىپ جاتىر. «وتكەندە 42500 تەڭگەنى ءساتتى العان تۇرعىنداردى ساراپتاي كەلىپ، جاعدايى وزگەرمەدى- اۋ دەپ بولجاعان كىسىلەرگە سۇراۋ جىبەرىپ جاتىرمىز. ءسىز وتكەندە 42500 تەڭگە الدىڭىز، بۇل جولى دا تابىسىڭىزدان ايىرىلدىڭىز با دەگەن س م س جىبەردىك. ءيا دەگەن جاۋاپ كەلسە، سول تۇرعىنعا ەش ءوتىنىشسىز تولەم تاعايىنداۋ شاراسىن جاسايمىز. سوندىقتان، بۇگىن س م س العان كىسىلەر تابىستان ايىرىلعانىڭىزدى راستاعان بولساڭىز، ەرتەڭ جۇما كۇنى پورتالدارعا ءوتىنىش بەرۋدىڭ قاجەتى جوق. جاي عانا ءوز مارتەبەڭىزدى تەكسەرسەڭىز، «ءسىز ءۇشىن ءوتىنىش قابىلداندى» دەپ جازىلىپ تۇرادى»، - دەدى ب. نۇرىمبەتوۆ.
سونىمەن بىرگە مينيستر جاردەماقى الۋعا وتىنىشتەردىڭ 1 - قىركۇيەككە دەيىن قابىلداناتىنىن جەتكىزدى. «بۇل جولى وسى كۇنگە دەيىن ۇلگەرۋ كەرەك دەگەن ەش شەكتەۋ قويمايمىز. بۇل تولەم شىلدە ايىنا ارنالادى. ءبىراق پورتالدار 1 - قىركۇيەككە دەيىن ءوتىنىش قابىلداي بەرەدى»، - دەدى ب. نۇرىمبەتوۆ.
بۇعان دەيىن سپيكەر 42500 تەڭگە جاردەماقى تولەنەتىن ساناتتاردى جاريالاعان ەدى. سونىمەن بىرگە مينيستر 42500 تەڭگە جاردەماقىنىڭ كىمدەرگە بەرىلمەيتىنىن ءتۇسىندىردى . ودان بولەك، 42500 تەڭگە جاردەماقىعا ءوتىنىم بەرۋ جولدارى دا جاريالاندى.
اۆتور: ايجان سەرىكجان قىزى