بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.
«2020-جىلدىڭ 3 - ناۋرىزىندا وڭتۇستىك كورەيانىڭ الەۋمەتتىك جەلىلەرىنىڭ ورىس ءتىلدى توپتارىندا وڭتۇستىك كورەيادا زاڭسىز جۇرگەن قازاقستان رەسپۋبليكاسىنىڭ ازاماتى كوروناۆيرۋسكە شالدىققانى راستالدى دەگەن اقپارات تارادى. اتالعان الەۋمەتتىك جەلىلەردىڭ حابارلاۋىنشا، قازاقستان ازاماتى كلينيكادان قاشىپ كەتىپ، قازىرگى ۋاقىتتا پوليتسيامەن ىزدەستىرىلۋدە. مۇنداي اقپارات «حابار 24» تەلەارناسىندا دا حابارلانعان. قازاقستاننىڭ وڭتۇستىك كورەياداعى ەلشىلىگى ءتيىستى شارالار جۇرگىزىپ، ونىڭ ناتيجەسىندە بۇل اقپارات راستالمادى. جەرگىلىكتى پوليتسيا جانە ءبىزدىڭ ازاماتپەن بايلانىس ورناتىلعان. ول بۇعان دەيىن كلينيكاعا بارماعىنىن جانە كوروناۆيرۋس بار-جوعىن انىقتايتىن قاندايدا ءبىر ساراپتاما تاپسىرماعانىن جەتكىزدى»، - دەدى رەسمي وكىل.
ونىڭ ايتۋىنشا، كورەي پوليتسياسىنىڭ اقپاراتىنا سايكەس، وسىدان بىرنەشە كۇن بۇرىن قازاقستاندىق ازامات كوروناۆيرۋسكە شالدىققان ادام بارعان قوعامدىق تاماقتانۋ ورنىندا بولعان.
«وسىعان بايلانىستى بەلگىلەنگەن تارتىپكە سايكەس، وعان جانە سول ۋاقىتتا اتالعان ورىندا بولعان بارلىق ادامدارعا ەگەر اۋرۋدىڭ سىرتقى بەلگىلەرى بايقالعان جاعدايدا ۆيرۋستىڭ بار-جوعىن انىقتاۋ تەستىن تاپسىرۋ قاجەت. وتانداسىمىز بارلىق قاجەتتى مەديتسينالىق پروتسەدۋرالاردان وتۋگە جانە جەرگىلىكتى بيلىكپەن ىنتىماقتاسۋعا دايىن. ءبىزدىڭ ەلشىلىك كوروناۆيرۋس وڭتۇستىك كورەيا اۋماعىندا انىقتالعان العاشقى كۇننەن باستاپ جەرگىلىكتى ىشكى ىستەر مينيسترلىگىمەن جانە اۋرۋلاردى باقىلاۋ، الدىن الۋ كورەي ورتالىعىمەن تىعىز جۇمىس ىستەپ كەلەدى. اتالعان ورتالىقتىڭ ۇسىنىسى بويىنشا ءبىزدىڭ وتانداسىمىز تەلەفون ارقىلى كۇندەلىكتى دەنساۋلىعىنا باقىلاۋ جۇرگىزىپ، ءۇي كارانتينىندە بولۋى قاجەت. بۇل ۇسىنىس اۋرۋدىڭ سىرتقى بەلگىلەرى جوقتىعىنا نەگىزدەلگەن جانە ونى ەمدەۋگە جاتقىزۋدان جانە كوروناۆيرۋستىڭ بولۋىن تەستىلەۋدەن باس تارتىلدى»، - دەدى ايبەك سمادياروۆ.
رەسمي وكىل قازاقستاننىڭ وڭتۇستىك كورەياداعى ەلشىلىگى بۇل ماسەلەنى تۇراقتى باقىلاۋعا العانىن باسا ايتتى.
«جوعارىدا باياندالعانعا بايلانىستى ق ر سىرتقى ىستەر مينيسترلىگى ب ا ق وكىلدەرىنە تەكسەرىلمەگەن اقپاراتتى جاريالاپ، دۇرلىكتىرمەۋدى جانە ۇرەي تۋدىرماۋدى سۇرايدى. سىرتقى ساياسي ۆەدومستۆونىڭ رەسمي تۇسىنىكتەمەسىن كۇتۋ قاجەت. سونىمەن قاتار، قازاقستان ازاماتتارىنداعى كوروناۆيرۋسكە قاتىستى اقپاراتتار الۋ ءۇشىن ق ر دەنساۋلىق ساقتاۋ مينيسترلىگىنە حابارلاسۋدى سۇرايمىز. ال سىرتقى ىستەر مينيسترلىگى شەت ەلدەردەگى ءبىزدىڭ وتانداستارىمىزعا قاتىستى اقپاراتتى تەكسەرىپ، ناقتى مالىمەت بەرۋگە تىرىسادى»، - دەدى ول.