بۇل تۋرالى پارلامەنت سەناتىنىڭ ءتوراعاسى داريعا نازاربايەۆا ءمالىم ەتتى، دەپ حابارلايدى قازاقپارات ءتىلشىسى.
«بۇگىن تالقىلايتىن تاقىرىبىمىز جەڭىل ونەركاسىپ سالاسىنا ارنالعان. بۇل قازاقستاننىڭ ونەركاسىبىندەگى ەڭ پروبلەمالى سەكتور دەپ ايتۋعا بولادى. سەبەبى ەكونوميكادا وڭدەۋشى سالانىڭ ايرىقشا باسىمدىقتا بولۋىنا بايلانىستى بۇل سالا كوپ ۋاقىت بويى نازاردان تىس قالىپ كەلدى. جەڭىل ونەركاسىپ ەكونوميكانى تۇرلەندىرۋگە، اسىرەسە، پايدالى قازبالار قورىنىڭ ازايىپ، مۇناي باعاسىنىڭ تومەندەگەن كەزىندە داعدارىس تولقىنىنا قارسى تۇرۋ مۇمكىندىگىنىڭ ءبىرى بولىپ سانالادى»، - دەدى د. نازاربايەۆا سەناتتا ەلىمىزدەگى جەڭىل ونەركاسىپ تاقىرىبىنا ارنالعان پارلامەنتتىك تىڭداۋدا.
وسى ورايدا ول جەڭىل ونەركاسىپ الەۋمەتتىك ماڭىزعا يە سالا ەكەنىن، حالىقتىڭ، ياعني ايەلدەردىڭ جوعارى دەڭگەيدە جۇمىسپەن قامتىلۋىن قامتاماسىز ەتەتىنىن اتاپ ءوتتى.
«بۇگىنگى تاڭدا ەلىمىزدەگى شاعىن جانە ورتا بيزنەس سۋبەكتىلەرىنىڭ بارلىق اكتيۆتەرىنىڭ 44 پايىزىن ايەلدەر باسقارادى. ولار شاعىن جانە ورتا بيزنەس سەكتورىنداعى بارلىق جۇمىس ورىندارىنىڭ 31 پايىزىن قامتاماسىز ەتەدى. جەڭىل ونەركاسىپتەگى ستارتاپتاردىڭ نەگىزگى ۇلەسى ايەلدەرگە تيەسىلى. ولاردىڭ بەلسەندىلىگىنىڭ ارقاسىندا سالا جاندانا باستادى»، - دەدى سەنات ءتوراعاسى.