«مەملەكەت باسشىسىنىڭ تاپسىرماسىمەن قازىرگى تاڭدا ەلىمىزدە قوعامدىق ديالوگ نىعايىپ، «حالىق ۇنىنە قۇلاق اساتىن مەملەكەت» تۇجىرىمداماسىنىڭ ىسكە اسىرىلىپ جاتقانىن بىلەسىزدەر. بۇل باعىتتا ءبىرشاما جۇمىس اتقارىلدى. ۇلتتىق قوعامدىق سەنىم كەڭەسى جۇمىس جۇرگىزۋدە. ونىڭ كەيىنگى وتىرىسىندا ەل پرەزيدەنتى قوعامدىق سەنىم كەڭەسىنىڭ مۇشەلەرىنىڭ ۇسىنىستارى بويىنشا ازىرلەنگەن رەفورمالار پاكەتىن جاريالادى. مەملەكەتتىك ورگانداردىڭ جۇمىسىنا اشىقتىق سيپاتىن بەرۋ جۇمىسى دا ۇمىت قالدىرىلعان جوق. ۇكىمەتتىك ەمەس ۇيىمدارمەن دە جۇمىس كۇشەيتىلگەن. بۇگىن بيلىك قوعامنىڭ سۇرانىسىنا شۇعىل جاۋاپ بەرەدى. بەلگىلى ءبىر ماسەلەلەردىڭ شەشىمىنە قاتىستى جەدەل ءتىل قاتادى. مەملەكەت باسشىسى بۇل رەتتە بارىمىزگە ۇلگى كورسەتىپ وتىر دەگەن ويدامىن»، - دەدى ماۋلەن اشىمبايەۆ.
ونىڭ ايتۋىنشا، بۇل ۇلگى مەملەكەتتىك ورگانداردى ازاماتتاردىڭ سۇرانىسىنا جەدەل جاۋاپ بەرۋگە جەتەلەپ، ماسەلەلەردى ۋاقتىلى شەشۋگە تىرىسۋدا.
«ەكونوميكانى ديۆەرتسيفيكاتسيالاۋ تۇرعىسىندا الدا ۇلكەن مىندەتتەر تۇر. كاسىپكەرلىكتى دامىتۋ ىسىنە دە ماڭىز بەرىلۋدە. اۋىل شارۋاشىلىعى، الەۋمەتتىك سالادا دا ماسەلەلەر شەشىمىن تابۋدا. بۇل جاعدايدا ءبىز ازاماتتىق اليانس پەن ونىڭ قۇرامىنا كىرەتىن 500-گە تارتا ۇيىم جۇمىسقا بەلسەندى ارالاسار دەگەن سەنىمدەمىز»، - دەدى ول.
ەسكە سالا كەتسەك، ەلوردادا قازاقستاننىڭ ازاماتتىق اليانسىنىڭ كونفەرەنسياسى ءوتىپ جاتىر.
اۆتور: ايان بەكەن ۇلى