ۇشاق اپاتىنان قۇتقارىلعان ءسابيدىڭ اتا- اناسى ءتىرى بولىپ شىقتى

 الەۋمەتتىك جەلىدە قۇتقارۋشىلاردىڭ 4-5 ايلىق نارەستەنى قيراعان سالوننان الىپ شىققانى تۋرالى ۆيدەو تارادى. ۆيدەو كوپشىلىكتىڭ كوڭىلىن بوساتتى.

كورەر جارىعى بار بالانىڭ اتا- اناسى ءتىرى مە، جوق پا؟ وسى ساۋال كوپشىلىكتىڭ كوكەيىندە تۇر.

قالالىق قوعامدىق دەنساۋلىق ساقتاۋ باسقارماسىنىڭ تاراتقان مالىمەتىنە سايكەس، اۋرۋحاناعا ءبىر جاسقا دەيىنگى 3 بالا تۇسكەن. دارىگەرلەر ۇشەۋىنىڭ دە اتا- اناسى ءتىرى ەكەنىن ايتتى.

ءبىراق ولاردىڭ ءارقايسىسى ءار اۋرۋحاناعا جەتكىزىلگەن.

مامانداردىڭ ايتۋىنشا، ۆيدەودا پوليتسيا قىزمەتكەرى كوتەرىپ بارا جاتقان 9 ايلىق ۇل بالا - عاتيات ءادىلجان ماقسۇت ۇلى.

بۇل بالا مي جاراقاتىمەن تۇسكەن. ءىشى، ىشكى ورگاندارى سوققى العان. جاعدايى ءبىرقالىپتى. ال ونىڭ اكەسى 27 جاستاعى عاتيات ماقسۇت بولاتقان ۇلى باس جاراقاتىمەن شۇعىل مەديتسينالىق قىزمەت كورسەتۋ اۋرۋحاناسىنا جاتقىزىلدى.

ال اناسى 27 جاستاعى عاتيات ايسۇلۋ ەرقانات قىزى كىشى جامباستاعى ۇرشىق بۋىنىنىڭ سوققىسى، بەل ومىرتقاسىنىڭ جاراقاتى دياگنوزىمەن ءتۇستى.

ودان بولەك بۇل اپاتتا 5 ايلىق جانە 8 ايلىق تاعى ەكى نارەستە جاراقات العان.

شامامەن 4-5 ايلىق نارەستەنىڭ اتى - اسىلىم اقبولات قىزى.

قىز بالانىڭ ميى جاراقاتتانىپ، سوققى العان. بالانىڭ ەڭبەگى ۇرىلىپ، سىرىلعان. دارىگەرلەر بالانىڭ جاعدايىن ءبىرقالىپتى اۋىر دەپ باعالاپ وتىر.

ءسابيدىڭ اتا- اناسى الماتى وبلىستىق كوپسالالى اۋرۋحاناسىندا جاتىر.

اناسى 28 جاستاعى ساتتىگۇل ۇسەنگە جاراقاتتان كەيىنگى پنيەۆموتوراكس دياگنوزى قويىلعان. وڭ جاق سان سۇيەگى، جامباس سۇيەگى جانە وڭ جاقتاعى 9 قابىرعاسى سىنعان. قازىر جاعدايى ءبىرقالىپتى.

اسىلىمنىڭ اكەسى 32 جاستاعى داۆاا اقبولات مي جاراقاتىمەن اۋرۋحاناعا ءتۇستى. ونىڭ دا جاعدايىن دارىگەرلەر ءبىرقالىپتى دەپ باعالاپ وتىر.

ۇشاق اپاتىنان 8 ايلىق قۇرالباي دامەلى دە زارداپ شەكتى.

بالا قوسارلى جاراقاتپەن تۇسكەن، ميى جاراقات العان، ميى شايقالعان. ءىشى، ىشكى ورگاندارى سوققى العان. جاعدايى اۋىر.

ونىڭ اكەسى - 39 جاستاعى نۇرلان تولەبايەۆ №4 اۋرۋحانادا جاتىر. جابىق مي جاراقاتىمەن تۇسكەن. ميى شايقالىپ، كەۋدە تۇسى سوعىلعان. جاعدايى وتە اۋىر.

فوتو: tokkoro.com

اۆتور: گۇلميرا عوسمانالي