قازاقستان رەسپۋبليكاسى پرەزيدەنتىنىڭ جانىنداعى ۇلتتىق قوعامدىق سەنىم كەڭەسى قازاقستان رەسپۋبليكاسىنىڭ پرەزيدەنتى جانىنداعى كونسۋلتاتيۆتىك-كەڭەسشى ورگان سانالادى. ۇلتتىق كەڭەس قىزمەتىنىڭ نەگىزگى ماقساتى - جۇرتشىلىقتىڭ، ساياسي پارتيالاردىڭ، ازاماتتىق قوعامنىڭ وكىلدەرىمەن كەڭىنەن تالقىلاۋ نەگىزىندە مەملەكەتتىك ساياساتتىڭ وزەكتى ماسەلەلەرى بويىنشا ۇسىنىستار مەن ۇسىنىمدار.
ول ءوز قىزمەتىندە قازاقستان رەسپۋبليكاسىنىڭ كونستيتۋتسياسىن، زاڭدارىن، قازاقستان رەسپۋبليكاسى پرەزيدەنتىنىڭ اكتىلەرىن، وزگە دە نورماتيۆتىك قۇقىقتىق اكتىلەردى، سونداي-اق وسى ەرەجەنى باسشىلىققا الادى.
ۇلتتىق كەڭەستىڭ نەگىزگى مىندەتتەرى: تۇجىرىمدامالاردىڭ، مەملەكەتتىك باعدارلامالاردىڭ جانە نورماتيۆتىك قۇقىقتىق اكتىلەردىڭ جوبالارىنا قوعامدىق ساراپتاما جۇرگىزۋ؛ جۇرتشىلىقتىڭ جانە ازاماتتىق قوعامنىڭ پىكىرىن ەسكەرە وتىرىپ ماڭىزدى ستراتەگيالىق پروبلەمالاردى قاراۋ؛ جۇرتشىلىقتىڭ، ساياسي پارتيالاردىڭ، ۇكىمەتتىك ەمەس سەكتوردىڭ جانە مەملەكەتتىك ورگانداردىڭ وكىلدەرى اراسىندا سىندارلى ديالوگتى قامتاماسىز ەتۋ؛ ءوزىنىڭ قۇزىرەتى شەگىندە قازاقستان رەسپۋبليكاسىنىڭ زاڭناماسىنا قايشى كەلمەيتىن وزگە دە قىزمەتتى جۇزەگە اسىرۋ بولىپ تابىلادى.
ۇلتتىق كەڭەستىڭ قۇرامى بەلگىلى مەملەكەت جانە قوعام قايراتكەرلەرىنىڭ، ساياسي پارتيالار، ۇكىمەتتىك ەمەس سەكتور وكىلدەرىنىڭ قاتارىنان قالىپتاستىرىلادى. قازاقستان رەسپۋبليكاسى پرەزيدەنتى اكىمشىلىگىنىڭ باسشىسى، قازاقستان رەسپۋبليكاسىنداعى ادام قۇقىقتارى جونىندەگى ۋاكىل، قازاقستان رەسپۋبليكاسىنداعى بالا قۇقىقتارى جونىندەگى ۋاكىل، قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل ءوز لاۋازىمدارىنا سايكەس ۇلتتىق كەڭەستىڭ قۇرامىنا كىرەدى. ءتوراعانىڭ شەشىمى بويىنشا ۇلتتىق كەڭەسكە رەسپۋبليكالىق جانە جەرگىلىكتى دەڭگەيدەگى قوعامدىق كەڭەستەردىڭ وكىلدەرى، سونداي- اق وزگە دە ادامدار ەنگىزىلۋى مۇمكىن.
ايتا كەتەرلىگى، وسى جىلدىڭ شىلدە مەن تامىز ايلارىندا الماتى جانە نۇر- سۇلتان قالالارىندا ۇلتتىق كەڭەسكە مۇشەلىككە ەنگەن ازاماتتارمەن كەزدەسۋ وتكىزىلگەن بولاتىن. سول كەزدەسۋدەگى تالقىلاۋ بارىسىندا ۇلتتىق قوعامدىق سەنىم كەڭەسىنىڭ العاشقى وتىرىسىنىڭ الدىندا ۇيىمداستىرۋشىلىق جيىندى وتكىزۋ ۋاعدالاستىعىنا قول جەتكىزىلدى.
ۇيىمداستىرۋشىلىق جيىن 28 -تامىزدا ق ر پرەزيدەنتى اكىمشىلىگىنىڭ باسشىسى، كەڭەس ءتوراعاسىنىڭ ورىنباسارى قىرىمبەك كوشەربايەۆتىڭ باسشىلىعىمەن ءوتتى. كەزدەسۋ جۇمىسىنا ۇلتتىق كەڭەستىڭ مۇشەلەرى قاتىستى. ونىڭ اياسىندا ۇلتتىق كەڭەس قىزمەتىنىڭ باعىتتارى مەن تەتىكتەرى، ۇلتتىق كەڭەستىڭ ءبىرىنشى وتىرىسىن وتكىزۋگە دايىندىق ماسەلەلەرى تالقىلانىپ، جۇمىس توپتارى قۇرىلدى. قازاقستان رەسپۋبليكاسى پرەزيدەنتىنىڭ 2019 -جىلعى 17 -شىلدەدەگى №63 -جارلىعىمەن بەكىتىلگەن قازاقستان رەسپۋبليكاسى پرەزيدەنتىنىڭ جانىنداعى ۇلتتىق قوعامدىق سەنىم كەڭەسى تۋرالى ەرەجەگە سايكەس، ۇلتتىق كەڭەس مۇشەلەرىنە كۋالىكتەر تاپسىرىلدى.
سول كۇنى ق ر پرەزيدەنتى قاسىم-جومارت توقايەۆ ۇلتتىق قوعامدىق سەنىم كەڭەسىنىڭ مۇشەلەرىمەن ءبىرقاتار كەزدەسۋلەر وتكىزدى.
اۆتور: مارلان جيەمباي