جيىنعا ق ر اقپارات جانە بايلانىس ءمينيسترى داۋرەن ابايەۆ، تۇركيا رەسپۋبليكاسى كولىك جانە ينفراقۇرىلىم ءمينيسترى مەحمەت جاحيت تۋرحان، قىرعىز رەسپۋبليكاسىنىڭ اقپاراتتىق تەحنولوگيالار جانە بايلانىس كوميتەتىنىڭ ءتوراعاسى باقىت شارشەمبيەۆ، ءازىربايجان رەسپۋبليكاسى كولىك، كوممۋنيكاتسيا جانە جوعارى تەحنولوگيالار ءمينيسترىنىڭ ورىنباسارى ەلمير ۆەليزادە، ۆەنگريانىڭ اقپاراتتىق كوممۋنيكاتسيالار، يننوۆاتسيالار جانە تەحنولوگيالار مەملەكەتتىك حاتشىسىنىڭ ورىنباسارى كارول بالاش سوليمار قاتىستى.
«زامان تالابىنان قالىس قالماي، اقپاراتتىق تەحنولوگيا سالاسىندا ارىپتەستىكتى كۇشەيتۋگە باسا نازار اۋدارامىز. سەبەبى، ءبىز بارلىق مۇمكىندىگىمىزدى ءتيىمدى دەڭگەيدە پايدالانىپ وتىرعان جوقپىز. ءبىزدىڭ ەل بىلتىردان باستاپ «سيفرلىق قازاقستان» باعدارلاماسىن قولعا الدى. باعدارلاما جوعارعى تەحنولوگيالاردى ەنگىزە وتىرىپ الەۋمەتتىك-ەكونوميكالىق سالانى قولداۋعا باعىتتالعان. جوبانى جۇزەگە اسىرۋ ءۇشىن مۇمكىندىك بارشىلىق. تاۋەلسىزدىك جىلدارى ەلدە زامان تالابىنا ساي اقپاراتتىق كوممۋنيكاتسيالىق تەحنولوگيالار لاندشافتى قالىپتاستى. سوڭعى 10 جىلدا ينتەرنەت جەلىسىن پايدالانۋشىلاردىڭ سانى 8 پايىزدان 76 پايىزعا ارتتى. ەلەكتروندى ۇكىمەت جۇيەسى قارقىندى دامىپ كەلەدى. وسى جۇيە بويىنشا 30 ميلليون مەملەكەتتىك قىزمەت كورسەتىلگەن. ءىرى جانە شاعىن قالالار 4 G بايلانىسىمەن قامتىلعان. اۋىلدى جەرلەردى كەڭ جولاقتى ينتەرنەتپەن قامتاماسىز ەتۋ جۇمىستارى جۇزەگە اسىرىلىپ جاتىر»، - دەدى د. ابايەۆ.
ءمينيستردىڭ ايتۋىنشا، 2018-جىلى ەكسپو حالىقارالىق كورمەسى وتكىزىلگەن بازانىڭ ينفراقۇرىلىمىندا «Astana HUB» دەپ اتالاتىن ІТ ستارتاپتاردىڭ حالىقارالىق تەحنوپاركى قۇرىلدى. ەرتەڭ ەۋرازيالىق ەكونوميكالىق وداققا مۇشە- مەملەكەتتەر تەحنوپاركتەرى ءوزارا بىرىگۋ جونىندەگى دەكلاراتسياعا قول قويادى. وسى ورايدا مينيستر تۇركىتىلدەس مەملەكەتتەر ىنتىماقتاستىعى كەڭەسى ەلدەرىندەگى ارىپتەستەرىن وسى كەلەشەگى زور تەحنولوگيالىق اليانستىڭ مۇشەسى بولۋعا شاقىردى.
«سونداي-اق، ءبىزدىڭ ءازىربايجاندىق ارىپتەستەرىمىزدىڭ باستاماسى بويىنشا «ترانسەۋرازيالىق سۋپەراقپاراتتىق ماگيسترال» قۇرۋ جونىندەگى جوباعا توقتالا كەتكىم كەلەدى. ونىڭ ماقساتى - فرانكفۋرت پەن گونكوگ اراسىنداعى ەۋرازيالىق ەلدەردىڭ اۋماعىن قامتيتىن تالشىقتى-وپتيكالىق ترانسۇلتتىق جەلى ورناتۋ. ترانزيتتىك جەلى 6 مەملەكەتتىڭ اۋماعىمەن وتەدى دەگەن جوسپار بار. بۇل - بولاشاعى زور جوبا. بۇگىنگى ءىس-شارا، ءبىزدىڭ ەلدەر اراسىنداعى اقپاراتتىق-كوممۋنيكاتسيالىق باعىتتاعى تىعىز قارىم-قاتىناستى ودان ءارى نىعايتۋعا تىڭ سەرپىن بەرەدى دەگەن سەنىمدەمىن»، - دەدى مينيستر.
ماڭىزدى وتىرىسقا دەيىن مۇشە مەملەكەتتەردىڭ جوعارى لاۋازىمدى تۇلعالارىنىڭ قاتىسۋىمەن اقپاراتتىق-كوممۋنيكاتسيالىق تەحنولوگيالار بويىنشا تۇركى كەڭەسى جۇمىس توبىنىڭ ءتورتىنشى وتىرىسى ءوتتتى.
مۇشە مەملەكەتتەر كيبەرقاۋىپسىزدىك، ەلەكتروندى ۇكىمەت، سپۋتنيكتىك قىزمەتتەر جانە TASIM جوباسى، تالشىقتى ينفراقۇرىلىم، سونداي-اق اقپاراتتىق كوممۋنيكاتسيالىق تەحنولوگيالارمەن بايلانىستى باسقا دا باسىم ماسەلەلەر بويىنشا ىنتىماقتاستىقتى كەڭەيتۋ جولدارىن تالقىلادى.
مينيسترلەر تۇركى تىلدەس ەلدەردەگى اقپاراتتىق تەحنولوگيالىق بايلانىستار ماسەلەسىن تالقىلاۋ ءۇشىن باس قوسقان ەدى.