بۇگىن پارلامەنتى سەناتىندا حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتورايىمى داريعا نازاربايەۆا ۇ ق ك وكىلىنەن لاڭكەستىكتىڭ ەلىمىزگە قانشالىقتى قاتەر ءتوندىرىپ تۇرعاندىعىن سۇرادى.
نۇرعالي بىلىسبەكوۆتىڭ ايتۋىنشا، سيريا، يراك جانە اۋعانستانداعى قاقتىعىس احۋالىن ەسكەرە وتىرىپ، وڭىردە بەلگىلى ءبىر سىن- قاتەر جاعدايى بار.
«وكىنىشكە قاراي، ءبىز حالىقارالىق لاڭكەستىك ۇيىمداردىڭ مۇددەلەرى بار وربيتادا تۇرمىز. بۇعان قاڭتار ايىندا الماتىدا انىقتالعان توپتى قۇرىقتاۋ فاكتىسى دالەل بولىپ وتىر. ولارعا قازاقستان اۋماعىندا تەراكتىلەر جاساۋعا نۇسقاۋلار شەتەلدەن بەرىلىپ كەلگەن. نەگىزگى ماقساتتارى - احۋالدى تۇراقسىزداندىرىپ، تارتىپسىزدىك جاعدايىن تۋدىرۋ»، - دەدى ن. بىلىسبەكوۆ.
ونىڭ سوزىنە قاراعاندا، ەگەر دە وسىعان دەيىن قاقتىعىستار اشىق تۇردە ۇيىمداستىرىلسا، قازىرگى كەزدە حالىقارالىق لاڭكەستىك ۇيىمدار قاقتىعىس ايماقتارىندا پارتيزاندىق سوعىس جۇرگىزۋگە ماشىقتانىپ كەلەدى. بۇل تۇرعىدا بارشا الەمدە تەررورلىق اكتىلەردى قايتا جانداندىرۋ اركەتتەرىنە تالپىنۋدا.
«وكىنىشكە قاراي، بۇعان دەيىن ەل اۋماعىنان شىعىپ كەتكەن ءبىزدىڭ ازاماتتار قاقتىعىس ايماقتارىندا ءجۇر. ءبىز بارىنشا ولاردىڭ جۇرگەن جەرلەرىن باقىلاۋعا تىرىسۋدامىز»، - دەدى نۇرعالي بىلىسبەكوۆ.
وسى ورايدا ول قازاقستان ازاماتتارى سيريادان ەۆاكۋاتسيالاۋ شاراسى جۇرگىزىلگەنىن ەسكە سالدى.
ق ر ۇ ق ك ءتوراعاسى ورىنباسارىنىڭ اتاپ وتۋىنشە، بۇگىندە قاقتىعىس ايماقتارىندا 300-دەن استام قازاقستاندىق بايقالعان، ونىڭ ىشىندە 100-گە جۋىعى سودىرلار قاتارىندا.
بۇعان دەيىن حابارلانعانداي، 10 - قاڭتاردا الماتى قالاسىندا ۇلتتىق قاۋىپسىزدىك كوميتەتى وتكىزگەن ارنايى وپەراتسيا ناتيجەسىندە تەرروريستىك اكتىلەر جاساۋعا دايىندالعان دەگەن كۇدىكپەن ورتا ازيا ەلدەرىنىڭ ازاماتتارىنان قۇرالعان توپ مۇشەلەرى ۇستالدى.
ايتا كەتەيىك، ق ر پارلامەنتى سەناتىنىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا «ت م د- عا قاتىسۋشى مەملەكەتتەردىڭ تەرروريزمگە جانە ەكسترەميزمنىڭ وزگە دە زورلىق- زومبىلىق كورىنىستەرىنە قارسى كۇرەستى جۇزەگە اسىراتىن قۇزىرەتتى ورگانداردى ماتەريالدىق- تەحنيكالىق قامتاماسىز ەتۋدەگى ىنتىماقتاستىعى تۋرالى كەلىسىمدى راتيفيكاتسيالاۋ تۋرالى» زاڭ جوباسى قارالدى. تالقىلاۋدان كەيىن كوميتەت مۇشەلەرى زاڭ جوباسىن سەناتتىڭ جالپى وتىرىسىنا شىعارۋ تۋرالى شەشىم قابىلدادى.
اۆتور: رۋسلان عابباسوۆ