بۇل سۇراققا ق ر سىرتقى ىستەر مينيسترلىگىندە وتكەن باسپا ءسوز ءماسليحاتىندا ق ر ۇلتتىق قاۋىپسىزدىك كوميتەتىنىڭ دەپارتامەنت باسشىسى باقىتبەك راحىمبەردييەۆ جاۋاپ بەردى، دەپ حابارلايدى قازاقپارات ءتىلشىسى.
«ارينە، وسى وپەراتسيا بىرنەشە اي بويى جۇرگىزىلدى. وتە كوپ قيىنشىلىق بولدى. البەتتە، جان- جاقتى ماسەلەلەر تولىققاندى تەكسەرىلدى، تالقىلاندى. كوپ ادامدار لاڭكەستىك تۇرعىسىنان «قايتارىلعان ازاماتتار جاعىنان قانداي دا ءبىر قاۋىپ بار ما؟» دەپ سۇراق قويادى. تاعى دا ايتايىن، ول جاعىنان ءبارى دە تەكسەرىلدى. قازىرگى تاڭدا قايتارىلعان ازاماتتاردىڭ ىشىندەگى 6 ەر كىسى جانە 1 ايەلدىڭ ۇستىنەن قىلمىستىق ىستەر قوزعالدى. وسىلار جانە قايتارىلعان باسقا ازاماتتار تەرروريستىك ارەكەتتەر تۇرعىسىنان تولىعىمەن تەكسەرىلەدى. ەگەر ونداي جاعداي دالەلدەنسە، ارينە، قىلمىستىق جاۋاپكەرشىلىككە تارتىلادى»، - دەدى باقىتبەك راحىمبەردييەۆ.
ونىڭ ايتۋىنا قاراعاندا، بىرنەشە جىل بويى قاقتىعىستار بولىپ جاتقان يراك پەن اۋعانستاننان دا قازاقستاندىقتار ەلگە قايتارىلعان.
«ول جاقتاردان دا قازاقستاننىڭ بىرنەشە ازاماتى قايتارىلعان بولاتىن. ولاردىڭ ىشىندە تەك 40 پايىزى عانا قىلمىستىق جاۋاپكەرشىلىككە تارتىلعان. قالعاندارىنا الدىن الۋ، وڭالتۋ شارالارى جۇرگىزىلگەن. سول ءۇشىن كوپشىلىك ول تۋراسىندا كوپ بىلە بەرمەۋى مۇمكىن. ءبىراق، ءبىزدىڭ ويىمىزشا، قايتارىلعان ازاماتتاردان ازىرشە ەشقانداي تەرروريستىك قاۋىپ جوق. بۇل رەتتە، ەڭ باستى ماسەلە - كىشكەنتاي بالالاردى قايتارۋ بولدى. ويتكەنى، قايتارىلعانداردىڭ باسىم كوپشىلىگى - 1-5 جاس ارالىعىنداعى بالالار»، - دەدى ول.
ەسكە سالا كەتسەك، كەشە مەملەكەت باسشىسى نۇرسۇلتان نازاربايەۆ سيريادان قازاقستان ازاماتتارىن ەۆاكۋاتسيالاۋ بويىنشا گۋمانيتارلىق وپەراتسياعا بايلانىستى مالىمدەمە جاساعان بولاتىن. مەملەكەت باسشىسى اتاپ وتكەندەي، 6 - قاڭتاردا قۇقىققورعاۋ ورگاندارى مەن سىرتقى ىستەر مينيسترلىگى جۇرگىزگەن گۋمانيتارلىق شارا ناتيجەسىندە سيريادان قازاقستاننىڭ 47 ازاماتى، سونىڭ ىشىندە 30 بالا ەلگە قايتارىلدى.
سونىمەن بىرگە، بۇگىنگى باسپا ءسوز ءماسليحاتىندا ق ر سىرتقى ىستەر ۆيتسە- ءمينيسترى ەرجان اشىقبايەۆ «جۋسان» وپەراتسياسىنان كەيىن دە قاقتىعىس ايماقتارىندا جۇرگەن قازاقستاندىقتاردى وتانىنا قايتارۋ جۇمىستارى جالعاساتىنىن ءمالىم ەتكەن بولاتىن.
اۆتور: ايان بەكەن ۇلى