بۇل تۋرالى قازاقپارات اقوردانىڭ فەيسبۋكتەگى رەسمي پاراقشاسىنا سىلتەمە جاساپ حابارلايدى.
«مەنىڭ تىكەلەي تاپسىرمام بويىنشا 6 - قاڭتاردا ءبىزدىڭ قۇقىق قورعاۋ جانە باسقا، سونىڭ ىشىندە سىرتقى ىستەر مينيسترلىگىمەن بىرگە ۇلكەن گۋمانيتارلىق وپەراتسيا ءوزىنىڭ جەمىسىن بەردى. سيريادان قازاقستاننىڭ 47 ازاماتى، ونىڭ ىشىندە ايەلدەر دە بار، اسىرەسە ايتا كەتەرلىگى 30 بالا بار. ءبىزدىڭ قۇزىرلى ورگاندارىمىز بۇرىن سوڭدى اتقارماعان ۇلكەن جۇمىستى اتقاردى. ولاردىڭ بارلىعى دا تەرروريستەردىڭ باقىلاۋىندا بولعان. ءار جاعدايلارمەن الدانىپ، ۋاقىتىسىندا داعدارىس بولىپ جاتقان سيرياعا ولاردى الىپ كەتكەن. ول جونىندە ايتقانبىز. ءبىراز ادامدار ولاردىڭ ايتقانىنا الدانىپ، سول جاقتا كوپشىلىگى سوعىستىڭ اراسىندا قايتىس بولدى»، - دەيدى اقوردا تاراتقان ۆيدەودا قازاقستان پرەزيدەنتى نۇرسۇلتان نازاربايەۆ.
مەملەكەت باسشىسىنىڭ ايتۋىنا قاراعاندا، اتالعان ازاماتتار بىزگە دوستىق قارىم- قاتىناسى بار مەملەكەتتىڭ كومەگىمەن، قازاقستاننىڭ ۇشاعىمەن اكەلىنگەن.
«ول كىسىلەر ءوزىمىزدىڭ جاعدايعا ۇيرەنۋ ءۇشىن، مەديتسينالىق باقىلاۋدان ءوتۋ ءۇشىن ءبىر اي باقىلاناتىن بولادى. وعان ءبىز كومەك كورسەتەمىز. تاعدىر تاۋقىمەتىن تارتقان ايەلدەر مەن بالالاردىڭ قۋانىشىندا شەك جوق. ولاردىڭ كوز جاسىن كوردىك. سوندىقتان، وسى جاعداي باسقالارعا قاجەتتى مالىمەتتەر بەرەدى جانە بولاشاقتا مۇنداي جاعدايدى بولدىرمايدى. كەلگەن ادامدار كورگەن قيىنشىلىقتارى مەن زاردابىن كەيىن وزدەرى ايتا جاتار. سوندىقتان، قازاقستان ءوز ازاماتتارىن قاي جەردە جۇرسە دە قولدايتىنىن كورسەتىپ وتىرمىز. ەلىمىزدىڭ قاۋىپسىزدىگىن، بەرەكە- بىرلىگى مەن تۇتاستىعىن قامتاماسىز ەتۋ مەملەكەتتىڭ ماڭىزدى مىندەتى. سوندىقتان، قاقتىعىس ايماعىندا ەرىكسىز جۇرگەندەردى، اسىرەسە بالالاردى قايتارۋ بويىنشا جۇمىستاردى ءبىز جالعاستىرا بەرەتىن بولامىز»، - دەدى نۇرسۇلتان نازاربايەۆ.
اۆتور: ايان بەكەن ۇلى