مينيستر قازاقستاندىقتاردىڭ جالاقىسى تۋرالى ايتتى

بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى تيمۋر سۇلەيمەنوۆ ايتتى، دەپ حابارلايدى قازاقپارات ءتىلشىسى.

«ەڭبەك نارىعىندا تۇراقتىلىق ترەندى بايقالادى. وسى جىلدىڭ باسىنان بەرى 414,5 مىڭ ادام جۇمىسقا ورنالاستىرىلدى (1- قازانداعى جاعداي بويىنشا- اۆت.). جۇمىسسىزدىق 4,9 پايىز دەڭگەيىندە ساقتالۋدا»، - دەدى 2018-جىلدىڭ قاڭتار-قىركۇيەك ايلارىنداعى الەۋمەتتىك-ەكونوميكالىق دامۋ كورسەتكىشتەرى تۋرالى بايانداعان مينيستر.

تيمۋر سۇلەيمەنوۆتىڭ ايتۋىنشا، جالاقى ءبىر قالىپتى قارقىنمەن ءوسىپ كەلەدى.

«اعىمداعى جىلعى قاڭتار-قىركۇيەكتە ورتاشا ايلىق جالاقى 158,2 مىڭ تەڭگەنى قۇرادى. ورتاشا ايلىق جالاقى 1,9 پايىزعا ءوسىپ وتىر»، - دەيدى ول.

مينيستر سونىمەن قاتار، وسى جىلدىڭ قاڭتار-تامىزىندا ناقتى اقشالاي كىرىستەر ناقتى جالاقىنىڭ ءوسۋى مەن ينفلياتسيالىق پروتسەستەردىڭ باياۋلاۋى اياسىندا 3,5 پايىزعا وسكەنىن اتاپ ءوتتى.

«قىركۇيەك ايىندا ەكونوميكانىڭ 6 پايىزعا ءوسۋى ارقاسىندا جىلدىڭ قورىتىندىسى بويىنشا، جالپى ىشكى ءونىم ءوسۋىنىڭ 4 دەڭگەيىنە جەتۋىنە مۇمكىندىك پايدا بولعانىن اتاپ وتكىم كەلەدى. ول ءۇشىن ءتورتىنشى توقساندا ەكونوميكانىڭ 3,9 پايىزدان كەم ەمەس دامۋىن قامتاماسىز ەتۋ قاجەت»، - دەدى تيمۋر سۇلەيمەنوۆ.