ەكسپودا ەكوكاپسۋلا ۇلگىسىندەگى ءۇيدى كورۋگە بولادى - فوتو

ونى مۇحيتتىڭ جاعاسىندا دا، تۇنگى اسپاننىڭ استىندا دا فوتوعا ءتۇسىرىپ، سان الۋان ينتەرنەت رەسۋرستارى مەن الەۋمەتتىك جەلىلەر ارقىلى تاراتتى.

ەكوكاپسۋلا ۇنەمدى تەحنولوگياسىمەن عانا ەمەس، رومانتيكالىق جاعىمەن دە حالىقتى باۋراپ الدى.

ەندى، اتالعان ونەرتابىستى ەكسپو-2017 كورمەسىندەگى سلوۆاكيا پاۆيلونىندا كورۋگە بولادى، دەپ حابارلايدى قازاقپارات ءتىلشىسى.

«بىلايشا ايتقاندا، بۇل - اقىلدى ميكروباسپانا. سلوۆاكيا اتالعان تەحنولوگيا ارقىلى ەنەرگەتيكالىق تاۋەلسىزدىك يدەياسىن ناسيحاتتاپ وتىر. سەبەبى ەكوكاپسۋلا كۇن مەن جەلدەن قۋات الادى. بۇدان بولەك، سۋدى سۇزگىدەن وتكىزۋ تەحنولوگياسى دا بار. سول سەبەپتى ونىمەن كەز كەلگەن جەرگە شىعىپ، ەمىن-ەركىن تۇرۋعا بولادى»، - دەيدى پاۆيلوننىڭ گيدى ليۋدميلا زاتوپتوۆا.

كاپسۋلا- ءۇيدىڭ اۋدانى - 8 شارشى مەتر. ول جەردە ەكى ادام تۇرا الادى. شاعىن ءۇي - قۇتقارۋشىلار، عالىمدار مەن تۋريستەر ءۇشىن تاپتىرايتىن باسپانا.

وندا دارەتحانا، دۋش، توسەك ورىن جانە تاماق ىستەيتىن جەر بار. كاپسۋلانىڭ جالپى سالماعى - 1200 كەلى. ال باكتاردى سۋعا تولتىرسا، 1900 كەلىگە دەيىن بارادى. ەكوكاپسۋلا ىڭعايلى بولسا دا، باعاسى ۋداي. باقانداي 76 مىڭ ەۋرو.

استانادا ول اقشاعا جەر الىپ، جەكە تۇرعىن ءۇي سالۋعا بولادى. «ءيا، ەكوكاپسۋلا ارزان ەمەس. سەبەبى ونى قۇراستىرۋ بارىسىندا قىمبات تەحنولوگيالىق ماتەريالدار قولدانىلعان. سلوۆاكيا حالقى ءۇشىن دە ول تىم ۇلكەن باعا. براتيسلاۆادا ءبىر بولمەلى ءۇي الۋعا بولادى. الايدا نەمىستەر مەن اۆستريالىقتاردىڭ قالتاسىنا شاق كەلەدى. ويتكەنى ولاردىڭ ءومىر ءسۇرۋ دەڭگەيى جوعارى»، - دەپ اتاپ كورسەتتى ليۋدميلا زاتوپتوۆا.