بۇگىن ق ر پارلامەنتى ءماجىلىسى مەن ءماسليحات دەپۋتاتتارى سايلاۋىن ازىرلەۋ جانە ۇيىمداستىرۋ ماسەلەلەرى جونىندەگى رەسپۋبليكالىق سەمينار-كەڭەستە ءسوز سويلەگەن ق ر ورتالىق سايلاۋ كوميسسياسىنىڭ ءتوراعاسى قۋاندىق تۇرعانقۇلوۆ وسىلاي دەدى.
«وزدەرىڭىزگە بەلگىلى، مەملەكەت باسشىسىنىڭ جارلىعىنا سايكەس پارلامەنت ءماجىلىسى دەپۋتاتتارىن سايلاۋ 2016-جىلدىڭ 20- ناۋرىزىنا بەلگىلەندى. سونىمەن قاتار ءبىز ءماسليحاتتار دەپۋتاتتارى سايلاۋىن دا سول كۇنى وتكىزۋ تۋرالى ءتيىستى قاۋلى قابىلدادىق. الداعى سايلاۋ ەلىمىزدىڭ ساياسي ومىرىندە ماڭىزدى رولگە يە بولاتىنى ءسوزسىز. سەبەبى ونىڭ ناتيجەسى ەلىمىزدىڭ ودان ارى دامۋىن ايقىندايتىن بولادى»، - دەدى ول.
وسى ورايدا و س ك ءتوراعاسى الداعى باستى ماقسات - سايلاۋدىڭ زاڭدىلىعىن جانە ءادىل ءوتۋىن قامتاماسىز ەتۋ ەكەنىن كەڭەسكە قاتىسۋشىلاردىڭ قاپەرىنە سالىپ ءوتتى.
«بۇل ماقساتتى ءتيىمدى ىسكە اسىرۋ ءۇشىن بارلىق قاجەتتى رەسۋرستار بار. سايلاۋ ناۋقانى 2 اي ىشىندە وتكىزىلەتىن بولادى. ال بۇل مەرزىم ىشىندە ءبىز كوپتەگەن ءىس-شارالاردى ىسكە اسىرۋىمىز قاجەت. وسىعان وراي الداعى ۋاقىتتا ءبىزدى جاۋاپتى كەزەڭ كۇتىپ تۇر. بۇل جۇمىس بارىمىزگە تانىس. سوندىقتان وسى سىننان ءبارىمىز سۇرىنبەي ابىرويمەن وتەتىندىگىمىزگە سەنىمدىمىن»، - دەدى ق. تۇرعانقۇلوۆ.
اۆتور: مارلان جيەمباي