سۇحبات بارىسىندا جۋرناليست ەرلان بەكحوجين «ماڭگىلىك ەل» يدەياسىنىڭ ماڭىزدىلىعىن سۇراعان بولاتىن.
«مەملەكەت حالىقتىڭ رۋحاني دامۋىن ەش ۋاقىتتا ەستەن شىعارماۋى كەرەك. قانداي دا ءبىر دامىعان ەكونوميكا حالىقتىڭ رۋحاني بايلىعىنسىز، بىلىمدىلىگىنسىز، ءدىنىنسىز تۇرلاۋلى بولمايدى. سوندىقتان دا ءبىز بۇل رۋحاني قولداۋدى ەش ۋاقىتتا ۇمىتقان ەمەسپىز»، - دەدى ن. نازاربايەۆ. بۇل رەتتە ەلباسى قازاقستانداعى ءدىنارالىق تۇسىنىستىك پەن كەلىسىمنىڭ ماڭىزدىلىعىن ايتا كەلە، مادەني مۇرا باعدارلاماسىنىڭ ناتيجەلەرىنە دە توقتالدى. پرەزيدەنتتىڭ ايتۋىنشا، اتالعان باعدارلاما اسىرەسە، ۇلت تاريحىندا تىڭ سەرپىلىس اكەلدى.
«بيىل ءبىز قازاق حاندىعىنىڭ 550 جىلدىعىن تويلايمىز. قازاق اتاۋى العاش رەت وسى تۇستا كوتەرىلدى، مۇنى ۇمىتپاۋىمىز كەرەك. بۇعان تاريحي دەرەكتەر ارقىلى لايىقتى جاۋاپ بەرىپ، ءبىزدىڭ قازاق ەلى اسپاننان تۇسپەگەنىن، دارحان دالامىزدا دامىپ، بابالارىمىز ۇلى بايتاعىمىز ءۇشىن قانىن توككەنىن دۇرىس دارىپتەۋىمىز كەرەك. اتا- بابامىزدىڭ ءدال بۇگىنگىدەي كۇندى ارمانداعانىن دا ەستەن شىعارۋعا بولمايدى. سول ءۇشىن ءبىزدىڭ تاريحتا كەرەي مەن جانىبەك حانداردان باستاپ ءبارىن تىزبەكتەپ شىعۋعا بولادى. بۇل ءبىزدىڭ بابالارىمىزدىڭ ۇلت رەتىندە ساقتالىپ قالۋ ءۇشىن جانىن بەرگەن تاعدىرلى دا تاريحي جىلدار»، - دەدى ن. نازاربايەۆ.
سونىمەن بىرگە ەلباسى تاريح ماسەلەسىنە توقتالا كەلە حاتقا ءتۇسىپ، مالىمەت رەتىندە ساقتالماعاندىقتان ۇلت تاريحىنا قاتىستى دۇنيەلەردىڭ كوبىنەن ايىرىلىپ قالعانىمىزدى ايتتى. دەگەنمەن، اڭىزدار ەل اۋزىندا ساقتالىپ كەلەدى، ول جوعالعان جوق، سونىڭ ىزىمەن تاريحتى دا جاڭعىرتۋ ماڭىزدى. وسى رەتتە ەلباسى بۇگىنگى كۇنى ۇلت تاريحىنا قاتىستى دەرەككوزدەر كوپ جەرلەردەن ىزدەستىرىلىپ جاتقانىنا دا توقتالدى.
«مەن وسى سۇحباتتى پايدالانا وتىرىپ، قازاق حالقىنىڭ تامىرى تەرەڭدە جاتقانىن ايتىپ وتكىم كەلەدى. ءبىز ساقتار مەن عۇنداردان باستاۋ الامىز، سولار - ءبىزدىڭ بابالارىمىز. سودان كەيىن تۇرىك قاعاناتى قۇرىلدى، ول باتىس، شىعىس قاعاناتتارى بولىپ ءبولىندى. وسى تۇرىك قاعاناتىنىڭ نەگىزىندە قازاق دالاسىندا مەملەكەتتىك قۇرىلىم پايدا بولدى، كەيىننەن الەمنىڭ ءتورت بۇرىشىنان جاۋلاۋشىلار شىقتى. شىڭعىسحاننىڭ قول استىنداعى ساربازداردىڭ باسىم بولىگى قازاق دالاسىنداعى رۋلاردان قۇرالدى. ودان كەيىنگى جىلدارى جوڭعارلاردىڭ باسقىنشىلىعى. وسىنىڭ ءبارىن بىزگە كەزىندە ايتۋعا تىيىم سالىپ كەلگەن ەدى، ەندى كىمنەن قورقامىز؟
ءبىزدىڭ تاريحىمىزدى ءبارى - جاۋلاۋ ەمەس، كەرىسىنشە ءوز تۋعان جەرىن قورعاۋمەن بايلانىستى. ءوزىنىڭ جەرىن، حالقىن قورعاۋ، ۇلتىن ساقتاپ قالۋ ءۇشىن قازاقتار ۇدايى سوعىسپەن كۇنىن وتكىزدى. ەشقاشان ەشكىمگە سوقتىققان ەمەسپىز، جاي جاتقان ەل بولدىق. وسىنىڭ ءبارىن قايتا جاڭعىرتىپ، بالالارىمىزعا تاريح- تامىرىمىزدىڭ تەرەڭدىگىن تۇسىندىرۋگە ءتيىسپىز. تاريحتىڭ ءبارىن تىرنەكتەپ جيناپ، قايتا جازۋعا ءتيىسپىز. بۇل ءوزىمىزدى كورسەتۋ ءۇشىن ەمەس، قاراپايىم عانا شىققان تەگىمىزدىڭ قايدان ەكەنىن، تاريحىمىزدى ءبىلىپ، كەلەشەك ۇرپاققا ءبىلدىرۋ ءۇشىن. بۇل كەز كەلگەن حالىقتا بۇل بار، ماسەلەن رەسەي ءوز تاريحىن ۇمىتپايدى، ۇلىقتايدى. امەريكا، ۇلىبريتانيا حالقى ءوز تاريحىن جاقسى بىلەدى. اركىم ءوزىنىڭ تاريحىن ايتقاندى ۇناتادى. بىزگە دە بۇل قاجەت. اڭىزدارىمىزدا نە ايتىلۋشى ەدى؟ ۇلتتىڭ، حالىقتىڭ قاھارماندىعى تۋرالى ەمەس پە؟ ەلىن، جەرىن قورعاعان، جۇرتىن ازات ەتكەن باتىرلار تۋرالى ەمەس پە؟ ەندەشە، بۇنداي تاريح تى جازۋ كىمدى رەنجىتەدى؟»، - دەپ تۇيىندەدى نۇرسۇلتان نازاربايەۆ.
اۆتور: قانات مامەتقازى ۇلى