ەلباسى بىلتىرعى جىل تۋرالى ايتا كەلە، وتكەن جىلى يندۋستريالاندىرۋ باعدارلاماسىنىڭ ەكىنشى بەسجىلدىعى اياقتالعانىن، ناتيجەسىندە وسى كەزەڭدە جەتى ءجۇز جەتپىستەن استام جاڭا ءوندىرىس اشىلعانىن، ءتورت جۇزگە تارتا جاڭا ونىمدەر شىعارىلا باستاعانىن اتاپ ءوتتى. «بيىلعى جىلى يندۋستريالاندىرۋ باعدارلاماسىنىڭ ەكىنشى بەسجىلدىعىندا ءبىراز شارالار ايقىندالدى. سونىڭ ىشىندە اعىمداعى جىلدىڭ وزىندە جەتپىس بەس جوبا ىسكە قوسىلىپ، جەتى جارىم مىڭ ادامدى تۇراقتى جۇمىس ورنىنا الادى دەپ جوسپارلاپ وتىرمىز.
ءبىز بىلتىر «نۇرلى جول» اتتى باعدارلامانى قابىلدادىق. ءبىزدىڭ ماقساتىمىز ەلىمىزدە زاماناۋي كولىكتىك ينفراقۇرىلىم قالىپتاستىرۋ. وسى باعدارلامانى جاڭا سىرتقى ەكونوميكالىق جاعدايعا بەيىمدەۋ كەرەك، بۇل ماقساتتا وتكەن اپتادا ۇكىمەتتىڭ كەڭەيتىلگەن وتىرىسى ءوتىپ، وندا بارلىق ماسەلەلەر ايقىندالدى»، - دەدى ن. نازاربايەۆ.
سونىمەن قاتار، ەلباسى جالپى سوماسى بەس ءجۇز ميلليارد تەڭگە قۇرايتىن اتالمىش باعدارلامانى سىرتقى اسەرلەرگە قارسى تۇرۋدىڭ ءتيىمدى قۇرالى بولاتىنىن اتاپ ءوتتى. ەلباسىنىڭ پايىمىنشا، باعدارلاما ناتيجەسىندە ءتيىمدى ينۆەستيتسيالار تارتۋعا، جاڭا ءوندىرىس ورىندارىن اشۋعا تولىق مۇمكىندىك قامتىلادى.
اۆتور: قانات مامەتقازى ۇلى