كەزدەسۋ بارىسىندا ا. داۋىلبايەۆ ەلدەگى زاڭدىلىق پەن قۇقىقتىق ءتارتىپتىڭ احۋالى، مەملەكەت باسشىسىنىڭ ازاماتتار قۇقىقتارى مەن بوستاندىقتارىن، كاسىپكەرلەردى قورعاۋعا باعىتتالعان تاپسىرمالارىنىڭ ورىندالۋى تۋرالى باياندادى.
مەملەكەت باسشىسى قۇقىق قورعاۋ جۇيەسىندە تاياۋدا بولعان وزگەرىستەردىڭ ماڭىزدىلىعىنا توقتالا كەلىپ، ولار ەلدەگى قىلمىستىلىقتىڭ ازايۋىنا سەپتىگىن تيگىزەتىنىن ايتتى.
- قىلمىستىق، اكىمشىلىك جانە اكىمشىلىك-پروتسەستىك كودەكستەرىنىڭ جاڭا رەداكسيادا قابىلدانۋىنا بايلانىستى تىركەلەتىن قىلمىستار سانى ارتتى، بۇل جالپى قىلمىستىق احۋالدى بايىپتاۋعا وڭ اسەرىن تيگىزدى. بارلىق، ءتىپتى ۇساق قۇقىق بۇزۋشىلىق تا تىركەلۋگە ءتيىس. بۇل جازادان قۇتىلماۋ قاعيداتىن ىسكە اسىرۋعا مۇمكىندىك بەرەدى. سونىمەن بىرگە جازانىڭ ايىپ سالۋ، ءبىراق مىندەتتى تۇردە بوستاندىعىنان ايىرماۋ سەكىلدى قارجىلىق تۇرلەرىنە دەن قويعان ءجون. وسىنىڭ ءبارى قىلمىستىلىق دەڭگەيىن تومەندەتۋگە جانە ازاماتتاردىڭ سەنىمىن ارتتىرۋعا باعىتتالعان، - دەدى نۇرسۇلتان نازاربايەۆ.
باس پروكۋرور قۇقىق قورعاۋ ورگاندارىندا ازاماتتار ارىزدارىنىڭ 93 پايىزى ءۇش كۇندىك مەرزىم ىشىندە قارالا باستاعانىن ايتتى. سونىمەن قاتار، بارلىق قىلمىستاردى 100 پايىز تىركەۋ قامتاماسىز ەتىلگەن. ەلدەگى جالپى قىلمىس دەڭگەيى 5,7 پايىزعا تومەندەدى، بۇل رەتتە اسا اۋىر قىلمىستار سانى 21 پايىزعا، اۋىر قىلمىستار 22 پايىزعا ازايعان.
سونداي-اق ا. داۋىلبايەۆ قازاقستان پرەزيدەنتىن ازاماتتاردىڭ ەڭبەك قۇقىقتارىنىڭ، حالىقتىڭ الەۋمەتتىك جاعدايى تومەن توپتارى مۇددەلەرىنىڭ قورعالۋى، كاسىپكەرلىككە قولداۋ كورسەتۋ، سوت وندىرىسىنە دەيىنگى وبەكتيۆتىلىكتى جانە تيىمدىلىكتى قامتاماسىز ەتۋ جونىندەگى پروكۋراتۋرا ورگاندارى جۇمىسىنىڭ ناتيجەلەرى تۋرالى حاباردار ەتتى.
بۇدان بولەك، باس پروكۋرور بيۋجەتتى تولىقتىرۋ جانە پايدالانىلماعان جەرلەردى مەملەكەت مەنشىگىنە قايتارۋ باعىتىندا قولدانىلىپ جاتقان شارالار تۋراسىندا اڭگىمەلەدى.
كەزدەسۋ قورىتىندىسى بويىنشا مەملەكەت باسشىسى زاڭدىلىق پەن قۇقىقتىق ءتارتىپتى بۇدان ءارى نىعايتۋعا، ازاماتتاردىڭ قۇقىقتارى مەن بوستاندىقتارىنا كەپىلدىكتى كۇشەيتۋگە، مەملەكەت پەن قوعام مۇددەلەرىن قامتاماسىز ەتۋگە باعىتتالعان ناقتى تاپسىرمالار بەردى.