پرەزيدەنتتىڭ وڭتۇستىك كورەياعا ساپارى اياسىندا جاسالعان كەلىسىمدەر مەن ۇجىمدىق قاۋىپسىزدىك تۋرالى شارت ۇيىمىنىڭ ەل اۋماعىنداعى وقۋ- جاتتىعۋى تۋرالى دا ايتىلىپتى. تولىعىراق Kazinform ءتىلشىسىنىڭ شولۋىنان وقىڭىز.
Reuters: قازاقستان مەن وڭتۇستىك كورەيا اتوم ەنەرگەتيكاسى بويىنشا مەموراندۋمعا قول قويدى
وڭتۇستىك كورەيا مەن قازاقستان سەيسەنبى كۇنى اتوم ەنەرگياسىن بەيبىت ماقساتتا پايدالانۋ سالاسىنداعى ىنتىماقتاستىق تۋرالى ءوزارا تۇسىنىستىك مەموراندۋمىنا قول قويدى. سونداي-اق تاراپتار ساۋدا، ەنەرگەتيكا، پايدالى قازبالار جانە جاساندى ينتەللەكت سالالارىندا بىرلەسىپ جۇمىس ىستەۋگە ۋاعدالاستى. سەۋلدىڭ باسپا ءسوز قىزمەتىنىڭ مالىمەتىن Reuters تاراتقان.
اتوم ەنەرگەتيكاسى سالاسىنداعى ءوزارا تۇسىنىستىك تۋرالى مەموراندۋم سەيسەنبى كۇنى قول قويىلعان 13 قۇجاتتىڭ قاتارىنا ەندى. قۇجاتتار مۇناي، عىلىم جانە تەحنولوگيا سالالارىنداعى بايلانىستى دا قامتيدى.
Jiji Press: پاريجدە قازاقستان كينوسى كۇندەرى باستالدى
17-19-قىركۇيەك كۇندەرى قازاقستان مادەنيەتى كۇندەرى اياسىندا پاريجدە قازاقستان كينوسى كۇندەرى باستالدى. شارادا وتاندىق كلاسسيكالىق كينوتۋىندىلار مەن زاماناۋي فيلمدەر ۇسىنىلماق. جاڭالىقتى Jiji Press ءبولىستى.
كينو كۇندەرى كورنەكتى رەجيسسەر ابدوللا قارساقبايەۆتىڭ «التى جاسار الپامىس» فيلمىمەن باستالدى. رەجيسسەردىڭ تۋعانىنا 100 جىل تولۋىنا وراي تۋىندىنىڭ 4K فورماتىندا رەستاۆراتسيادان وتكەن نۇسقاسى كورسەتىلگەن.
زاماناۋي وتاندىق كينولارلىڭ قاتارىنداعى «Qaitadan» جانە «يگرومانكا» فيلمدەرى دە كورەرمەنگە جول تارتتى. ەكى تۋىندى مەملەكەتتىك قولداۋمەن تۇسىرىلگەن.
Xinhua News: مۇناي ءوندىرۋ كولەمى 2040-جىلعا قاراي ارتادى
قازاقستان 2040-جىلعا قاراي مۇناي وڭدەۋ كولەمىن ەكى ەسەدەن استام ارتتىرىپ، مۇناي ءوندىرۋ مەن وڭدەۋ اراقاتىناسىن قازىرگى 5:1 كورسەتكىشىنەن 2,5:1 گە دەيىن قىسقارتۋدى جوسپارلاپ وتىر. بۇل تۋرالى ەنەرگەتيكا مينيسترلىگىنىڭ مۇناي وڭدەۋ جانە مۇناي ونىمدەرىن ءوندىرۋ باسقارماسىنىڭ باسشىسى نازىم بەكباتىروۆا مالىمدەگەن. رەسمي دەرەكتى قىتايلىق Xinhua اگەنتتىگى جاريالادى.
قازاقستاندا 2025-2040-جىلدارعا ارنالعان مۇناي وڭدەۋ سالاسىن دامىتۋ تۇجىرىمداماسى بەكىتىلدى. وندا مۇناي وڭدەۋ قۋاتى، مۇنايدى وڭدەۋ تەرەڭدىگى جانە مۇناي ساپاسىنا قاتىستى جوسپار قامتىلعان.
ايتا كەتەرلىگى، مۇناي ءوندىرۋ كولەمىن ۇلعايتۋ ءۇشىن قازاقستانعا 15-19 ميلليارد دوللار كولەمىندە ينۆەستيتسيا قاجەت.
ت ا س س: «شەپ-2026» وقۋ-جاتتىعۋىنىڭ ەكىنشى كەزەڭى باستالدى
قازاقستانداعى «كوكتال» وقۋ-جاتتىعۋ پوليگونىندا ورتالىق ازيا ءوڭىرىنىڭ «شەپ-2026» وقۋ-جاتتىعۋى باستالدى. رەسەيلىك تاسس اقپارات اگەنتتىگىنىڭ حابارلاۋىنشا، شارا تۋرالى ۇ ق ش ۇ بىرىككەن شتابىنىڭ باسپا ءسوز حاتشىسى ۆلاديسلاۆ شەگريكوۆيچ مالىمدەگەن.
وقۋ-جاتتىعۋ 13-18-قىركۇيەك ارالىعىندا ءوتتى. وندا 1500 گە جۋىق اسكەري قىزمەتشى جانە 300 دەن استام قارۋ-جاراق، اسكەري جانە ارنايى تەحنيكا، ونىڭ ىشىندە 115 ۇشقىشسىز ۇشۋ اپپاراتى قامتىلعان. وعان قوسا كىشى شابۋىلداۋ توپتارى موتوتسيكلدەردى، كۆادروتسيكلدەردى جانە «ۇلان-1» جانە «ۇلان-2» تاكتيكالىق كولىكتەرىن پايدالاندى.
پراكتيكالىق ءىس-قيمىلدار تاۋلى-شولەيت جەرلەردىڭ ەرەكشەلىكتەرىن ەسكەرە وتىرىپ جۇرگىزىلگەن جانە قازاقستاننىڭ شەكارا قىزمەتى مەن ۇلتتىق ۇلانى قوسىلعان.