الماتىدا 6 بالدان جوعارى جەر سىلكىنىسىنىڭ قاۋپىن باعالايتىن ارنايى اقپاراتتىق جۇيە ازىرلەنەدى
الماتى. KAZINFORM - الماتى قالاسىنىڭ سەيسميكالىق قاۋىپسىزدىك جانە جۇمىلدىرۋ دايىندىعى باسقارماسى مەن توتەنشە جاعدايلار جانە تابيعي اپاتتار قاۋپىن ازايتۋ ورتالىعى ءبىرقاتار باعىت بويىنشا ىنتىماقتاستىقتى كۇشەيتەدى.
تاراپتار الماتىنىڭ دامۋ ورتالىعىمەن بىرلەسىپ ءتيىستى مەموراندۋمعا قول قويدى.
باسقارما باسشىسى باتىرحان سۇلەيمەنوۆ قالادا عيماراتتارعا سەيسميكالىق اۋديت جۇرگىزۋ مەن توتەنشە جاعداي كەزىندە حالىقتىڭ ءىس ارەكەت مادەنيەتىن ارتتىرۋ بويىنشا جۇمىستىڭ بەلسەندى جۇرگىزىلىپ جاتقانىن اتاپ ءوتتى. ايتۋىنشا، سەيسمواۋديت اياقتالعاننان كەيىن 6 بالدان جانە ودان جوعارى جەر سىلكىنىستەرىنىڭ ىقتيمال ناتيجەسىن مودەلدەۋدىڭ ارنايى اقپاراتتىق جۇيەسى ازىرلەنەدى.
«مەموراندۋم ورتالىق ازيا ەلدەرىنىڭ قولدانىستاعى ۇلتتىق جۇيەسىن بىرىكتىرۋ جولىمەن جەر سىلكىنىسىنىڭ تۋىنداۋ قاۋپى تۋرالى ەرتە حابارلاۋدىڭ جانە ءوزارا حابارلاۋدىڭ وڭىرلىك جۇيەسىن كۇشەيتۋ جونىندەگى قىزمەتتى شوعىرلاندىرۋعا باعىتتالعان. سونداي-اق، ءبىز ءتۇرلى اپاتتىڭ قاۋىپ فاكتورىن باعالاۋ بويىنشا حالىقارالىق ادىستەمەلەردى بىرلەسىپ ەنگىزەمىز»، - دەدى باتىرحان سۇلەيمەنوۆ.
ءوز كەزەگىندە توتەنشە جاعدايلار جانە تابيعي اپاتتار قاۋپىن ازايتۋ ورتالىعىنىڭ ديرەكتورى سەرىك اۋباكىروۆ بۇل كەلىسىم بارلىق مۇددەلى تاراپتىڭ كۇش- جىگەرىن شوعىرلاندىرۋعا جانە توتەنشە جاعدايدىڭ الدىن الۋ سالاسىنا ينۆەستيتسيا تارتۋعا ىقپال ەتەتىنىن جەتكىزدى.
ايتا كەتەيىك، ورتالىق ق ر سىرتقى ىستەر مينيسترلىگىندە مەملەكەتارالىق ورگان - حالىقارالىق ۇيىم رەتىندە تاعايىندالعان.
نەگىزگى قىزمەت - اپاتتار قاۋپىن ازايتۋ، توتەنشە جاعدايدىڭ الدىن الۋ جانە جويۋ، سونداي-اق كليماتتىڭ وزگەرۋىنە بەيىمدەلۋ سالاسىنداعى وڭىرلىك جانە حالىقارالىق ىنتىماقتاستىقتى نىعايتۋ. بۇعان دەيىن مەگاپوليستە جەر سىلكىنىسىن ەسكەرتەتىن جۇيە سىناقتان ءوتىپ، الماتىلىقتار پرەزيدەنتتىك حابارلاما العان بولاتىن.
الماتى اكىمدىگى اتاپ وتكەندەي، Mass Alert جۇيەسىنىڭ SMS- كە قاراعاندا ءبىرقاتار ارتىقشىلىعى بار. حابارلاما ءموبيلدى وپەراتور جەلىسىنە قوسىلعان، سونداي- اق جەكە تاڭدالعان گەوگرافيالىق ايماقتاعى بارلىق ابونەنتكە كەلەدى. سونىمەن قاتار جۇيە جەلىلەردىڭ شامادان تىس جۇكتەلۋ جاعدايىندا جۇمىس ىستەيدى.
Cell Broadcast تەحنولوگياسىنىڭ باستى ارتىقشىلىعى - قامتۋ ايماعىنداعى بارلىق ابونەنتتى بىردەن ءارى جاپپاي ەسكەرتەدى.
اۆتور
الما مۇقانوۆا