پرەمەر-مينيسترگە ءتۇرلى سالادا قولدانۋعا ارنالعان وتاندىق تەحنولوگيالىق كومپانيالار مەن ۇيىمداردىڭ جاساندى ينتەللەكت نەگىزىندەگى ازىرلەمەلەرى تانىستىرىلدى.
فورۋم اياسىندا 60 تان استام جاڭا كەلىسىمگە قول جەتكىزىلدى. پرەمەر- مينيستر تيىمدىلىگى دالەلدەنگەن تەحنولوگيالاردى ودان ءارى كەڭىنەن ەنگىزۋدىڭ ماڭىزدى ەكەنىن باسا ايتتى.
- قازاقستان سيفرلىق ينفراقۇرىلىمدى وزىق قارقىنمەن دامىتۋدا. قازىرگى تاڭدا «دەرەكتەردى وڭدەۋ ورتالىقتارىنىڭ القابى» مەگاجوباسى بەلسەندى جۇزەگە اسىرىلىپ جاتىر. بۇل - ورتالىق ازياداعى ەنەرگەتيكالىق الەۋەتى 1 گ ۆت-قا دەيىن جەتەتىن ەڭ ءىرى كامپۋس. دەرەكتەردى وڭدەۋ ورتالىقتارى جاساندى ينتەللەكتىنى، بۇلتتى سەرۆيستەردى، عىلىمي زەرتتەۋلەر مەن جاڭا سيفرلىق وندىرىستەردى دامىتۋعا نەگىز بولادى. ءبىز باسقا دا جاھاندىق تەحنولوگيالىق كومپانيالارمەن ىنتىماقتاستىق ورناتۋعا ءازىرمىز، - دەدى ولجاس بەكتەنوۆ.
سونىمەن قاتار فورۋم اياسىنداعى پلەنارلىق سەسسيادا DREAM كومپانياسىنىڭ پرەزيدەنتى سەباستيان كۋرتس، Freedom Holding Corp. كومپانياسىنىڭ باس اتقارۋشى ديرەكتورى تيمۋر تۋرلوۆ، Crimson Education كومپانياسىنىڭ نەگىزىن قالاۋشى دجەيمي بيتون جانە Higgsfield AI كومپانياسىنىڭ باس ديرەكتورى الەكساندر ماشرابوۆ ءسوز سويلەدى.
سەسسيا قورىتىندىسى بويىنشا پرەمەر-مينيستر جاساندى ينتەللەكتىنى دامىتۋعا جانە سيفرلىق ترانسفورماتسياعا ۇلەس قوسقان تەحنولوگيا سالاسىنىڭ وكىلدەرىنە ماراپاتتار تابىستادى.
AI جانە Digital Bridge Awards 2026 جەڭىمپازدارى:
• GovTech Project of the Year - egov.GPT، تابيعي تىلدەگى سۇرانىستار ارقىلى مەملەكەتتىك قىزمەتتەر الۋعا مۇمكىندىك بەرەتىن جاساندى ينتەللەكت پلاتفورماسى؛
• EdTech Project of the Year - GoPrep, IELTS ەمتيحانىنا دايىندالۋعا ارنالعان جاساندى ينتەللەكت پلاتفورماسى؛
• Startup of the Year – HealthTech، مەديتسينالىق قۇجاتتاردى اۆتوماتتاندىرۋ جانە تەكسەرۋ جوباسى؛
• Corporate AI Transformation of the Year - Aventa Aى، جۇمىس ۇدەرىستەرىن اۆتوماتتاندىرۋعا ارنالعان كورپوراتيۆتىك GenAI پلاتفورماسى؛
• International Breakthrough of the Year - Higgsfield Ai، جاساندى ينتەللەكت كومەگىمەن بەينە جاساۋعا جانە وڭدەۋگە ارنالعان پلاتفورما؛
• Venture Fund of the Year - MA7 Ventures, جاھاندىق الەۋەتى بار تەحنولوگيالىق ستارتاپتارعا $150 مىڭنان $1 ميلليونعا دەيىن ينۆەستيتسيا سالاتىن ۆەنچۋرلىك قور؛
• Best Creative Industry Project of the Year – ōzen، مۋزىكانى سيفرلىق پلاتفورمالارعا تاراتۋعا جانە اۆتورلىق قۇقىق يەلەرىنە تيەسىلى سىياقىنى باسقارۋعا ارنالعان سيفرلىق پلاتفورما.
ەسكە سالايىق، مۇنىڭ الدىندا AI جانە Digital Bridge فورۋمىندا قانداي كەلىسىمدەر مەن مەموراندۋمدارعا قول قويىلعانى تۋرالى جازعانبىز.