ادىلەت ءمينيسترى ءدىني نەكە قيۋ راسىمىنە قاتىستى پىكىر ايتتى

استانا. KAZINFORM – ق ر ادىلەت ءمينيسترى ەرلان سارسەمبايەۆ زاڭ تالاپتارى بويىنشا نەكە قيۋعا ەكپىن قويىلعانىن ايتتى.

بۇگىن پارلامەنت ماجىلىسىندەگى باسپا ءسوز ءماسليحاتىندا تىلشىلەر ءدىني جولمەن قيىلعان نەكەلەردى زاڭسىز ەتۋگە قاتىستى شەشىم قابىلداۋ مۇمكىندىگى جونىندە سۇرادى.

- ءبىز كونستيتۋتسياعا سايكەس زايىرلى مەملەكەتپىز. مەملەكەت ءدىن ماسەلەسىنەن بولىنگەن، سونداي-اق ءدىن دە مەملەكەت ماسەلەسىنەن بولەك. سوندىقتان «نەكە (ەرلى-زايىپتىلىق) جانە وتباسى» كودەكسىندە ءبىز نەكە تۋرالى ءداستۇرلى كوزقاراستاردى ۇستانامىز. بۇل تۇرعىدا ونى قايتا قاراۋ نەمەسە ءدىني كوزقاراستارمەن ارالاستىرۋ قاراستىرىلماعان، - دەدى ە. سارسەمبايەۆ.

ۆەدومستۆو باسشىسىنىڭ ايتۋىنشا، ەگەر رەسمي نەكەگە تۇرماعاندار كەيىن اجىراسسا دا، ورتاق بالالارىنىڭ اليمەنت ماسەلەسىن زاڭمەن شەشۋگە بولادى.

ايتا كەتەيىك، «نەكە (ەرلى-زايىپتىلىق) جانە وتباسى» كودەكسىنىڭ 2-بابىنا سايكەس، تەك مەملەكەتتىك ورگاندار قيعان نەكە عانا تانىلادى. ءدىني جورالعىلار مەن راسىمدەر بويىنشا قيىلعان نەكە (ەرلى-زايىپتىلىق) تىركەۋشى ورگانداردا تىركەلگەن نەكەگە (ەرلى-زايىپتىلىققا) تەڭەستىرىلمەيدى جانە ءتيىستى قۇقىقتىق سالدارلار تۋدىرمايدى.

ەسكە سالساق، استانا قالاسىنداعى ىرىسكەلدى مەشىتىنىڭ باس يمامى نۇرلان بايجىگىت ۇلى نەكەنى مەشىت پەن ا ح ا ت- تا قيعىزۋدىڭ ايىرماشىلىقتارى تۋرالى پىكىر ءبىلدىردى.