الماتىدا-ناۋرىز مەيرامىندا 60 توننا ناۋرىز كوجە مەن باۋىرساق تاراتىلادى
اكىمدىك مالىمەتىنشە، الماتىدا مەرەكەنى تويلاۋ 14-ناۋرىزدا كوك توبە ساياباعى اۋماعىندا وتكەن «كورىسۋ كۇنى» شاراسىمەن باستالعان.
نەگىزگى ءىس- شارالار 21-ناۋرىز، تاڭعى ساعات 10:00 دە ناۋرىز مەرەكەسىنە ارنالعان شەرۋدەن باستالادى. شەرۋ الماتى قالاسىنىڭ ورتالىق كوشەلەرى - اباي جانە ابىلاي حان داڭعىلدارىنىڭ بويىمەن ءوتىپ، تولە بي كوشەسىنە دەيىن بارادى. مەرەكەلىك ءىس-شاراعا بارلىعى 500 ادام قاتىسادى.
ساعات 11:00 دە «استانا» الاڭىندا «ناۋرىز-دۋمان» گالا-كونسەرتى وتەدى. ارتىستەر ساحنادا ۇلتتىق جانە الەمدىك مۋزىكالىق شىعارمالاردى ورىنداپ، اكتەرلەردىڭ جانە بالالار ۇجىمدارىنىڭ قاتىسۋىمەن تەاترلاندىرىلعان مۋزىكالىق قويىلىم كورسەتىلەدى.
22-ناۋرىز، ساعات 17:00 دە «استانا» الاڭىندا جاس ورىنداۋشىلاردىڭ قاتىسۋىمەن Zhuldyzdy Almaty كونسەرتى ۇيىمداستىرىلادى.
21-22-ناۋرىزداعى مەرەكەلىك ءىس- شارالار كەزىندە قالا تۇرعىندارى مەن قوناقتارىنا 60 توننا-ناۋرىز كوجە مەن باۋىرساق تاراتىلاتىن بولادى.
18-24-ناۋرىز ارالىعىندا پانفيلوۆ جانە جىبەك جولى كوشەلەرىندە «ناۋرىز Fest» ءىس-شاراسى وتەدى. بۇل كۇندەرى سۋرەتشىلەر مەن قولونەرشىلەردىڭ كورمەلەرى ۇيىمداستىرىلىپ، كەلۋشىلەر كىلەم توقۋ، جىبەك پەن كەراميكانى بوياۋ، اسىل تاستاردى كەسۋ، بىلعارى، اعاش، شىنى جانە سازبەن جۇمىس ىستەۋ تەحنولوگياسىمەن تانىسا الادى. سونداي-اق انيماتورلاردىڭ قويىلىمدارى، حالىقتىق كاراوكە، بيدەن فلەشموب، كونكۋرستار، ەسترادا جۇلدىزدارىنىڭ قاتىسۋىمەن جاندى داۋىستاعى كونسەرت، سىيلىقتاردىڭ ۇتىس ويىندارى، باسقا دا شارالار وتكىزۋ جوسپارلانۋدا.
ابىلاي حان داڭعىلىنىڭ اۋماعىندا بالالار الاڭى ورنالاسادى. بۇل الاڭدا انيماتورلار، سيرك ارتىستەرى، قۋىرشاق تەاترىنىڭ اكتەرلەرى ونەر كورسەتەدى جانە مۇرات مۇتىرعانوۆتىڭ شوۋى مەن حالىق ەرتەگىلەرىنىڭ كەيىپكەرلەرى قۋىرشاقتارىنىڭ قويىلىمدارى بولادى. سونداي-اق بۇل الاڭدا ويىن فيگۋرالارى ورناتىلىپ، تانىمدىق باعدارلامالار، وتباسىلىق جانە بالالار ويىندارى، ەستافەتالار وتەدى.
اربالارعا ورنالاستىرىلعان 10 ارنايى سورەدە جانە شاتىرلاردا قولونەرشىلەردىڭ بۇيىمدارى ۇسىنىلادى.
تولە بي كوشەسىنىڭ بويىندا (پانفيلوۆ كوشەسىنەن نازاربايەۆ داڭعىلىنا دەيىنگى ارالىق) سپورت ايماعى ورنالاساتىن بولادى. مۇندا «اسىق اتۋ»، «جامبى اتۋ»، «ارقان تارتۋ»، «قول كۇرەس»، «قازاقشا كۇرەس»، «كوكپار تارتۋ»، «توعىز قۇمالاق» سپورتتىق ويىن-ساۋىق ۇلتتىق جارىستارىن وتكىزۋ جوسپارلانعان.
«الاتاۋ» ءداستۇرلى ونەر تەاترىنىڭ اۋماعىندا 21-23-ناۋرىز ارالىعىندا ارتىستەردىڭ ونەرىن جانە «ناۋرىز- دۋمان» تەاترلاندىرىلعان سپەكتاكلىن كورسەتۋ ءۇشىن ارنايى ساحنا ورناتىلىپ، ەتنوقالاشىق ۇيىمداستىرىلادى. مۇندا قولونەرشىلەردىڭ كورمەلەرى، شەبەرلىك سىنىپتارى، فلەشموبتار، قۋىرشاقتار شەرۋى، سپورتتىق جارىستار وتەدى.
سونىمەن قاتار، ءداستۇرلى تۇردە قالانىڭ بارلىق اۋداندارىندا 14-24-ناۋرىز ارالىعىندا ساعات 17:00 دەن 20:00 گە دەيىن مەرەكەلىك ءىس-شارالار ۇيىمداستىرىلىپ، ساحنادا قازاق مۋزىكالىق فولكلورىنىڭ ۇزدىك شىعارمالارى ورىندالادى.