قاسىم-جومارت توقايەۆقا قورعانىس مينيسترلىگىندە بيۋجەت قاراجاتىنىڭ جۇمسالۋ تيىمدىلىگىنە قاتىستى جوسپاردان تىس جۇرگىزىلىپ جاتقان اۋديت تۋرالى ەسەپ بەرىلدى.
- اۋقىمدى تەكسەرىس 50 نىساندى، سونىڭ ىشىندە 48 اسكەري ءبولىمدى قامتيدى. وسى ماقساتتا مەملەكەتتىك اۋديت جۇيەسىنىڭ جەتەكشى ماماندارىنان، سونداي-اق IT جانە بايلانىس سالاسى ساراپشىلارىنان ارنايى توپ جاساقتالدى. اۋديت اياسىندا قارۋلى كۇشتەر قىزمەتىنىڭ بارلىق نەگىزگى باعىتىنداعى احۋالعا باعا بەرىلەدى، - دەلىنگەن حابارلامادا.
اتاپ ايتقاندا، اسكەري بولىمشەلەردىڭ ماتەريالدىق-تەحنيكالىق قامتاماسىز ەتىلۋى، جەكە قۇرامنىڭ دايارلىعى، اسكەري وقۋ-جاتتىعۋ جيىندارىنىڭ وتكىزىلۋى، اسكەري ينفراقۇرىلىمنىڭ دامۋى، قارۋ-جاراق پەن تەحنيكانىڭ جاڭعىرۋى، سيفرلىق جۇيەلەردىڭ اقاۋسىز جۇمىس ىستەۋى تۇگەل تەكسەرىلمەك.
پرەزيدەنتكە مەملەكەتتىڭ قورعانىس سالاسىنداعى تاپسىرىسىنا جۇرگىزىلگەن اۋديتتىڭ ناتيجەلەرى تانىستىرىلدى.
- جوعارى اۋديتورلىق پالاتا تەكسەرىس قورىتىندىسى بويىنشا انىقتالعان زاڭ بۇزۋشىلىقتاردى جويۋ ءۇشىن ۇكىمەتكە جانە سالالىق مەملەكەتتىك ورگاندارعا 57 ناقتى ۇسىنىم مەن تاپسىرما جولدادى. سونىمەن قاتار مەملەكەت باسشىسىنا ەكونوميكالىق دامۋ مەن الەۋمەتتىك سالانىڭ باسىم باعىتتارىن قامتيتىن جوسپارلى اۋديتورلىق تەكسەرىستىڭ بارىسى باياندالدى، - دەپ حابارلادى اقوردادان.
بۇدان بولەك، ءاليحان سمايىلوۆ استانادا وتكەن ازيا جوعارى اۋديت ورگاندارى ۇيىمى باسقارما كەڭەسىنىڭ 63-وتىرىسىنىڭ قورىتىندىسى تۋرالى ايتتى. جيىنعا 19 ەلدىڭ وكىلى قاتىسقان. مۇنداي فورماتتاعى ءىس-شارا قازاقستاندا العاش رەت وتكىزىلىپ وتىر.
كەزدەسۋ سوڭىندا پرەزيدەنت قورعانىس مينيسترلىگىندە اۋديت جۇرگىزۋگە جانە تۇتاس مەملەكەتتىك اۋديت جۇيەسىن ودان ءارى جەتىلدىرۋگە قاتىستى ءبىرقاتار ناقتى تاپسىرما بەردى.
ەسكە سالا كەتەيىك، جوعارى اۋديتورلىق پالاتا قورعانىس مينيسترلىگىنىڭ بيۋجەتى مەن اسكەري بولىمدەردىڭ ماتەريالدىق-تەحنيكالىق قامتاماسىز ەتىلۋىنە اۋديت جۇرگىزۋدى باستاعان بولاتىن.
قورعانىس سالاسىنا تەكسەرىس جۇرگىزۋگە 24-قىركۇيەكتە كاسپيدەگى اسكەري وقۋ-جاتتىعۋ كەزىندە 17 اسكەري قىزمەتشىنى اشىق تەڭىزگە الىپ كەتكەنى سەبەپ بولدى. ولاردىڭ ۇشەۋى قۇتقارىلىپ، 14 اسكەري قىزمەتشى قازا تاپقان ەدى.