بۇل تۋرالى مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى. «اۋىل شارۋاشىلىعىن سۋبسيديالاۋ جايىندا. سوڭعى 5 جىلدا بۇل ماقساتقا 2 تريلليون تەڭگەدەن استام قاراجات ءبولىندى. ناتيجەسىندە نە بولدى؟ بيۋدجەت قاراجاتى جۇمسالادى، ونىڭ جۇمسالۋىنا ءبىرىڭعاي باقىلاۋ جوق. ايتارلىقتاي ەكونوميكالىق تيىمدىلىگى دە جوق»، - دەدى قاسىم- جومارت توقايەۆ ەكىباستۇزدا ءوتىپ جاتقان مونوقالالاردى دامىتۋ ماسەلەلەرىنە ارنالعان جينالىستا.
اقوردانىڭ Twitter- دەگى پاراقشاسىندا پرەزيدەنت جەمقورلىققا قارسى قىزمەتكە بۇل سالاعا ساراپتاما جۇرگىزۋدى تاپسىرعانى اتاپ وتىلگەن.
«سىبايلاس جەمقورلىققا قارسى قىزمەتكە پروكۋراتۋرامەن جانە باسقا دا ورگاندارمەن بىرگە بۇل سالاعا كەشەندى ساراپتاما جاساۋدى تاپسىردىم. وعان قوعامدى جانە اگرارييلەردىڭ وزدەرىن دە تارتۋ كەرەك»، - دەدى مەملەكەت باسشىسى.
مەملەكەت باسشىسى قاسىم- جومارت توقايەۆ ۇكىمەتكە ينفلياتسيانى 8,5 پايىز شەگىندە ساقتاۋدى تاپسىردى.
«جەدەل ارەكەت ەتۋدى تالاپ ەتەتىن ماسەلەلەرگە دە توقتالعىم كەلەدى. بيىل الەۋمەتتىك ماڭىزى بار ازىق- تۇلىك باعاسى 10,4 پايىزعا قىمباتتادى. 9 ايدىڭ قورىتىندىسى ينفلياتسيانىڭ جالپى ءوسىمى 8,9 پايىز بولدى. مەنىڭ تاپسىرماممەن الىپساتارلىق سىزباسىن تەرگەۋ جونىندەگى وڭىرلىك كوميسسيا قۇرىلدى. ناتيجەسىن پرەزيدەنت تە، ازاماتتار دا كورمەيدى. پرەزيدەنت اكىمشىلىگى ءمان- جايدى انىقتاپ، ءبىر اپتالىق مەرزىمدە بايانداۋى ءتيىس»، - دەدى قاسىم- جومارت توقايەۆ ەكىباستۇزدا ءوتىپ جاتقان مونوقالالاردى دامىتۋ ماسەلەلەرىنە ارنالعان جينالىستا.
اقوردانىڭ Twitter- دەگى مالىمەتىنە سايكەس، پرەزيدەنت ازىق- تۇلىك ينفلياتسياسى 6 پايىزدىق دەڭگەيدەن اسىپ تۇسەتىندىگىنە نازار اۋدارتتى. «ەندىگى ۋاقىتتا ءوسىم قىسىمىمەن ازىق- تۇلىك باعاسى 6 پايىزدىق دەڭگەيدەن اسىپ تۇسەتىندىگى انىق. ۇكىمەتكە جانە ۇلتتىق بانككە ينفلياتسيانى 8,5 پايىز شەگىندە ساقتاۋدى تاپسىرامىن»، - دەدى مەملەكەت باسشىسى.
بۇعان دەيىن حابارلاعانىمىزداي، بۇگىن قاسىم- جومارت توقايەۆ جۇمىس ساپارىمەن پاۆلودار وبلىسىنىڭ ەكىباستۇز قالاسىنا كەلدى . مەملەكەت باسشىسى جۇمىس ساپارى بارىسىندا مونوقالالاردى دامىتۋ جونىندە كەڭەس وتكىزىپ، پرەزيدەنتتىك جاستار كادر رەزەرۆىنىڭ وكىلدەرىمەن كەزدەسەدى. سونىمەن قاتار قالاداعى يندۋستريالدى كاسىپورىندارعا بارادى دەپ جوسپارلانعان.
اۆتور: مارلان جيەمباي