قازاقپارات قۇجاتتىڭ تولىق ءماتىنىن جاريالايدى.
***
قازاقستان رەسپۋبليكاسىندا تەكسەرۋلەرگە جانە پروفيلاكتيكالىق باقىلاۋ مەن قاداعالاۋدى بارىپ جۇرگىزۋگە موراتوري ەنگىزۋ تۋرالى
قازاقستان رەسپۋبليكاسىندا شاعىن كاسىپكەرلىكتى، ونىڭ ىشىندە ميكروكاسىپكەرلىكتى دامىتۋ ءۇشىن جاعدايدى جاقسارتۋ ماقساتىندا قاۋلى ەتەمىن:
1. ورتالىق مەملەكەتتىك جانە جەرگىلىكتى اتقارۋشى ورگاندار 2020 -جىلعى 1 - قاڭتاردان باستاپ 2023 -جىلعى 1 - قاڭتارعا دەيىن شاعىن كاسىپكەرلىك سۋبەكتىلەرىن، ونىڭ ىشىندە ميكروكاسىپكەرلىك سۋبەكتىلەرىن تەكسەرۋلەردى جانە پروفيلاكتيكالىق باقىلاۋ مەن قاداعالاۋدى بارىپ جۇرگىزۋدى توقتاتسىن، وعان مىنالار قوسىلمايدى:
1) حالىقتىڭ ءومىرى مەن دەنساۋلىعىنا، قورشاعان ورتاعا، زاڭدىلىق پەن قوعامدىق تارتىپكە ىقتيمال تۇردە جاپپاي قاتەر، كونستيتۋتسيالىق قۇرىلىسقا جانە ۇلتتىق قاۋىپسىزدىككە تۋرا نەمەسە تىكەلەي قاتەر توندىرەتىن بۇزۋشىلىقتاردى بولدىرماۋعا نەمەسە جويۋعا باعىتتالعان، سونداي- اق «قارجى نارىعى مەن قارجى ۇيىمدارىن مەملەكەتتىك رەتتەۋ، باقىلاۋ جانە قاداعالاۋ تۋرالى» 2003 -جىلعى 4 - شىلدەدەگى قازاقستان رەسپۋبليكاسىنىڭ زاڭىندا كوزدەلگەن نەگىزدەر بويىنشا جۇرگىزىلەتىن تەكسەرۋلەر؛
2) قازاقستان رەسپۋبليكاسىنىڭ زاڭناماسىندا، بەلگىلەنگەن تالاپتاردى بۇزۋ فاكتىلەرىنىڭ تۋىنداۋ سەبەپتەرىن انىقتاۋ ءۇشىن، باقىلاۋ مەن قاداعالاۋدىڭ ناقتى سۋبەكتىسىنە (وبەكتىسىنە) قاتىستى ناقتى فاكتى بويىنشا ءبىر جوسپاردان تىس تەكسەرۋ جەتكىلىكسىز جانە وسى ناقتى فاكتىگە بايلانىستى وزگە دە سۋبەكتىلەرگە قاتىستى باقىلاۋ مەن قاداعالاۋ تالاپ ەتىلەتىن جاعدايلاردا وسى تارماقتىڭ 1) تارماقشاسىنا سايكەس تەكسەرۋلەر؛
3) ءوز قىزمەتىنە قاتىستى كاسىپكەرلىك سۋبەكتىلەرىنىڭ وتىنىشتەرى نەگىزىندە، ونىڭ ىشىندە «رۇقساتتار جانە حابارلامالار تۋرالى» 2014 -جىلعى 16 - مامىرداعى قازاقستان رەسپۋبليكاسىنىڭ زاڭىنا سايكەس رۇقسات الۋعا ارنالعان ءوتىنىش بويىنشا تەكسەرۋلەر جانە پروفيلاكتيكالىق باقىلاۋدى بارىپ جۇرگىزۋ؛
4) 2014 -جىلعى 4 - شىلدەدەگى قازاقستان رەسپۋبليكاسىنىڭ قىلمىستىق- پروسەستىك كودەكسىندە كوزدەلگەن نەگىزدەر بويىنشا تەكسەرۋلەر؛
5) قازاقستان رەسپۋبليكاسى پرەزيدەنتىنىڭ جانە قازاقستان رەسپۋبليكاسى باس پروكۋرورىنىڭ تاپسىرماسى بويىنشا پروكۋراتۋرا ورگاندارىنىڭ تەكسەرۋلەرى؛
6) كەدەندىك تەكسەرۋلەر؛
7) قارسى سالىقتىق تەكسەرۋلەر؛
8) سالىق تولەۋشى مەن ونىڭ دەبيتورلارى اراسىنداعى ءوزارا ەسەپ ايىرىسۋدى ايقىنداۋ، سالىق ورگاندارىندا تىركەۋ ەسەبىنە قويۋ، كاسسا بويىنشا شىعىس وپەراتسيالارىن توقتاتا تۇرۋ تۋرالى سالىق ورگانى شىعارعان وكىمدەردى ورىنداۋ ماسەلەلەرى بويىنشا تاقىرىپتىق سالىقتىق تەكسەرۋلەر؛
9) حالىقتىڭ سانيتاريالىق- ەپيدەميولوگيالىق سالاماتتىلىعى سالاسىندا ءونىم قاۋىپسىزدىگىنىڭ مونيتورينگىن جۇزەگە اسىرۋ ءۇشىن ءونىمدى ىرىكتەۋ جانە وعان سانيتاريالىق- ەپيدەميولوگيالىق ساراپتاما جاساۋ ماقساتىنداعى پروفيلاكتيكالىق قاداعالاۋدى بارىپ جۇرگىزۋ؛
10) قازاقستان رەسپۋبليكاسىنىڭ سايكەستىكتى باعالاۋ سالاسىنداعى اككرەديتتەۋ تۋرالى زاڭناماسىنىڭ ساقتالۋىن تەكسەرۋلەر جانە پروفيلاكتيكالىق باقىلاۋدى بارىپ جۇرگىزۋ؛
11) جەر قويناۋىن پايدالانۋشىلار.
2. وسى جارلىقتىڭ 1-تارماعىنىڭ 1) جانە 2) تارماقشالارىندا كوزدەلگەن تەكسەرۋلەر ورتالىق مەملەكەتتىك نەمەسە جەرگىلىكتى اتقارۋشى ورگاننىڭ ءبىرىنشى باسشىسىنىڭ شەشىمى نەگىزىندە جۇرگىزىلەدى دەپ بەلگىلەنسىن.
3. وسى جارلىق شاعىن كاسىپكەرلىك سۋبەكتىلەرىن، ونىڭ ىشىندە ميكروكاسىپكەرلىك سۋبەكتىلەرىن 2019 -جىلى باستالعان تەكسەرۋلەرگە جانە پروفيلاكتيكالىق باقىلاۋ مەن قاداعالاۋدى بارىپ جۇرگىزۋگە قولدانىلمايدى.
4. قازاقستان رەسپۋبليكاسىنىڭ ۇكىمەتى وسى جارلىقتى ىسكە اسىرۋ جونىندە شارالار قابىلداسىن.
5. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.
6. وسى جارلىق العاش رەسمي جاريالانعان كۇنىنەن باستاپ قولدانىسقا ەنگىزىلەدى.
قازاقستان رەسپۋبليكاسىنىڭ پرەزيدەنتى ق. توقايەۆ
نۇر- سۇلتان، اقوردا، 2019 -جىلعى 26 - جەلتوقسان
№ 229