قىمباتتى وتانداستار!
ساناۋلى ساتتەردەن سوڭ ءبىز جاڭا 2019 -جىلعا قادام باسامىز. جاڭا جىل - بارشا جۇرت ايرىقشا سەزىممەن، كوتەرىڭكى كوڭىلمەن قارسى الاتىن جارقىن مەيرامنىڭ ءبىرى. تاريح قويناۋىنا ەنگەلى تۇرعان 2018- جىل ەگەمەن ەلىمىز ءۇشىن بەرەكەلى ءارى مەرەكەلى جىل بولدى. بيىل تاۋەلسىزدىگىمىزدىڭ سيمۆولىنا اينالعان اقوردالى استانامىزدىڭ 20 جىلدىق مەرەيتويىن اتاپ وتتىك. باس قالامىزدى ۇلىقتاۋعا بارلىق وڭىرلەرىمىز جۇمىلا اتسالىسىپ، بىرلىك پەن ىنتىماقتىڭ ۇلگىسىن كورسەتتى.
جىل باسىندا ءتورتىنشى ونەركاسىپتىك ريەۆوليۋتسيا جاعدايىنداعى دامۋدىڭ جاڭا مۇمكىندىكتەرىن ايقىندادىق. «بەس الەۋمەتتىك باستامانى» جاريالاپ، حالقىمىزدىڭ ءال- اۋقاتىن ودان ءارى ارتتىرۋدى ماڭىزدى مىندەت رەتىندە بەلگىلەدىك. كۇللى تۇركى جۇرتى قاستەرلەيتىن تۇركىستان قالاسى قايتا تۇلەپ، وبلىس ورتالىعى مارتەبەسىن الدى. شىرايلى شىمكەنتتىڭ حالقى ءبىر ميلليوننان اسىپ، رەسپۋبليكالىق ماڭىزى بار قالا اتاندى. ءبىز حالىقارالىق ساياساتتا جانە ەكونوميكادا ماڭىزى زور شارالاردى جۇزەگە اسىردىق. قازاقستان بىرىككەن ۇلتتار ۇيىمى قاۋىپسىزدىك كەڭەسىندەگى ەكى جىلدىق قىزمەتىن ابىرويمەن اياقتادى.
دۇنيە ءجۇزىنىڭ الىپ ەلدەرى باس قوساتىن وسى بەدەلدى ورگانعا قاڭتار ايىندا ءتوراعالىق ەتتىك. ساپار بارىسىندا امەريكا قۇراما شتاتتارىنىڭ پرەزيدەنتىمەن كەزدەسىپ، ماڭىزدى ۋاعدالاستىققا قول جەتكىزدىك. الەمنىڭ ءار تۇكپىرىنەن كەلگەن ءدىن كوشباسشىلارى استانادا جينالىپ، وركەنيەتتەر ديالوگىنا ءۇن قوستى. اقتاۋدا كاسپيي تەڭىزىنىڭ قۇقىقتىق مارتەبەسىن بەكىتكەن تاريحي قۇجات قابىلداندى.
«استانا» حالىقارالىق قارجى ورتالىعىن جاھان جۇرتىنا تانىستىرىپ، تىڭ باستامالاردى قولعا الدىق. ورتالىق ازيا مەملەكەتتەرىنىڭ بەس پرەزيدەنتى ءبىزدىڭ ەلوردادا باس قوسىپ، تاتۋ كورشىلىك قاتىناستاردى جانداندىردىق. تاۋەلسىز قازاقستاننىڭ نىشانى سانالاتىن ءتول تەڭگەمىزدىڭ 25 جىلدىعىن اتاپ وتتىك.
ۇلى دالاداعى ەجەلگى كوشپەندىلەر وركەنيەتىنىڭ جاھاندىق ماڭىزىن قايتا جاڭعىرتتىق. وسى ايتۋلى مەرەكەلەر مەن اۋقىمدى شارالار ەلدىگىمىزدى تانىتىپ، بىرلىگىمىزدى بەكەمدەي ءتۇستى. بۇل جەتىستىكتەرگە وزدەرىڭىزبەن بىرگە جەتتىك، يگى باستامالاردى بىرگە جۇزەگە اسىردىق.
ارداقتى اعايىن! جاڭا جىلدى ءار ادام ۇكىلى ۇمىتپەن، ىزگى نيەتپەن جانە اق تىلەكپەن قارسى الادى. كەلەر جىل جاعىمدى جاڭالىققا، قۋانىشتى ساتتەرگە تولى بولسىن! تابالدىرىقتان اتتاعالى تۇرعان 2019 -جىل ءار وتباسىعا مولشىلىق پەن جاقسىلىق اكەلسىن!