قىزىلوردالىق وقۋشى قاۋىپسىز ليفت جوباسىن ويلاپ تاپتى

قىزىلوردا. KAZINFORM - قىزىلوردا وبلىسى جاڭاقورعان اۋدانىنداعى 286-ورتا مەكتەپتىڭ 6-سىنىپ وقۋشىسى نۇرسەرى ايتجان ادام ءومىرى ءۇشىن قاۋىپسىز ليفت جوباسىن ويلاپ تاپتى.

ستاتيستيكاعا سۇيەنسەك، قازاقستانداعى ءاربىر ءتورتىنشى ليفت قاۋىپتى. باسىم بولىگى جوندەۋدى نەمەسە تولىق اۋىستىرۋدى قاجەت ەتەدى. جالپى ليفتتىڭ قاۋىپسىزدىگىنە ەشكىم كەپىلدىك بەرە المايدى.

تالاپتى جاستىڭ جوباسىندا قاۋىپسىزدىك ماسەلەسىنە ايرىقشا كوڭىل بولىنگەن.

- قازىرگى ليفت تروستارى وتە ءالسىز، ءۇزىلىپ كەتسە، ادامدى امان الىپ قالۋ مۇمكىن ەمەس. سوندىقتان وعان اۆتوكولىكتەگى سياقتى قاۋىپسىزدىك جاستىعىن ورناتۋدى ءجون كوردىم. قانداي دا ءبىر اقاۋ شىققان جاعدايدا جاستىق اشىلىپ، ادام ءومىرىن ساقتاپ قالۋعا كومەكتەسەدى، - دەدى نۇرسەرى ايتجان.

وقۋشى كوركەم ەڭبەك ءپانىنىڭ مۇعالىمدەرى وركەن اقبايەۆ، قۇداباي تاستانبەكوۆ، ەرلان رايىمبەك جانە روبوتوتەحنيكا مۇعالىمى ايدوس اراساتتىڭ كومەگىمەن سۋ ديىرمەنى، سۋ ءۇستى كوپىرى سياقتى وزگە دە ەرەكشە جوبالار جاساپ شىعاردى.

ايتا كەتەيىك، تاعى ءبىر قىزىلوردالىق جاس ونەرتاپقىش ءورتتىڭ الدىن الاتىن اقپاراتتىق جۇيە جاساعان.