زياندى وندىرىستە جۇمىس ىستەيتىندەرگە 208 مىڭ تەڭگەگە دەيىن تولەنەدى
ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا زياندى ەڭبەك جاعدايلارىندا جۇمىس ىستەيتىن ازاماتتارعا ارنايى الەۋمەتتىك تولەم قالاي تاعايىندالاتىنىن ءتۇسىندىردى، دەپ حابارلايدى Kazinform.
ءمينيستردىڭ ايتۋىنشا، مەملەكەت باسشىسى قازاقستان حالقىنا جولداۋىندا زياندى ەڭبەك جاعدايلارىندا ۇزاق ۋاقىت جۇمىس ىستەپ جۇرگەن ازاماتتارعا 55 جاستان باستاپ ارناۋلى الەۋمەتتىك تولەم ەنگىزۋ بويىنشا تاپسىرما بەردى. وسى تاپسىرمانى ورىنداۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى قارجى نارىعىن رەتتەۋ جانە دامىتۋ اگەنتتىگى سەكىلدى مۇددەلى مەملەكەتتىك ورگانداردىڭ قاتىسۋىمەن ءتيىستى زاڭنامالىق وزگەرىستەر ازىرلەندى.
«زاڭنامانى سەنات ماقۇلدادى، ول پرەزيدەنتتىڭ قول قويۋىنا جولدانايىن دەپ وتىر. زاڭ جوباسىندا كوپ وزگەرىستەر ەنگىزىلەدى. بىرىنشىدەن، ارنايى الەۋمەتتىك تولەم كوپ جىلدار بويى جۇمىس ىستەگەن، 55 جاسقا تولعان جانە 7 جىل بويى وزدەرىنە جيىنتىق جارنالار اۋدارعان ازاماتتارعا تولەنەدى. ارنايى الەۋمەتتىك تولەم ءتورت قاراجات كوزىنەن: رەسپۋبليكالىق بيۋجەتتەن 2 ەڭ تومەن كۇنكورىس دەڭگەيى مولشەرىندە؛ ءومىردى ساقتاندىرۋ جونىندەگى كومپانيالاردان؛ جۇمىس بەرۋشىلەردىڭ قاراجاتىنان، ب ج ز ق- دان مىندەتتى كاسىپتىك زەينەتاقى جارنالارى ەسەبىنەن تولەنەدى»، - دەدى ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ورتالىق كوممۋنيكاتسيالار قىزمەتىندە.
تولەمدەردىڭ ورتاشا مولشەرى 208 مىڭعا جەتەدى جانە 63 جاسقا دەيىن تولەنەدى. ءاربىر جۇمىسكەر ءۇشىن تولەم مولشەرى ب ج ز ق- داعى جيناقتارىنا بايلانىستى بولادى.
ارنايى الەۋمەتتىك تولەمدەردى الۋ ءۇشىن ەڭبەك جاعدايلارى زياندى جۇمىستان - دەمالىسقا نەمەسە جەڭىلىرەك جۇمىسقا اۋىسۋى كەرەك. 2024-جىلى ارنايى الەۋمەتتىك تولەمگە 37 مىڭنان استام جۇمىسكەر، 2030-جىلى - 58 مىڭنان استام، 2035-جىلى - 95 مىڭنان استام جۇمىسكەر ۇمىتكەر بولا الادى.
