زووپاركتە تۇلكى بولىپ جۇمىس ىستەيتىن ادامنىڭ تاعدىرى
پاكىستانداعى كاراچي حايۋاناتتار باعىنداعى ەڭ قىزىق تىرشىلىك يەسى - ادام. دەنەسى - تۇلكى، باسى ايەل ادامعا ۇقسايتىن ميفتىك تىرشىلىك يەسىنىڭ ءرولىن ەر ادام وينايدى. بۇل تۋرالى Bugin.kz ءتىلشىسى NTD ارناسىنا سىلتەمە جاساپ حابارلايدى.
حايۋاناتتار باعىندا بۇل جانۋارعا قىزىعۋشىلىق تانىتاتىن قوناقتار وتە كوپ. ونىڭ تاپقىر اڭگىمەسى مەن بولجاۋ قابىلەتى وبرازىن ەرەكشەلەندىرە تۇسەدى. ەر ادام ايەلدەر سەكىلدى جارقىن تۇستەرمەن ماكياج جاسايدى.
مۇمتاز ءوزىنىڭ وبرازى تۋرالى:
«مەن افريكادا 35 جىل بۇرىن وسى قالىپتا دۇنيەگە كەلدىم. مەن ءتاتتى ءبالىش پەن شىرىن جانە جەمىستەر جەپ ءومىر سۇرەمىن»، - دەپ مونولوگ جاسايدى.
شاعىن مونولوگتان كەيىن ول كەلۋشىلەردىڭ بىرنەشە تىلدەگى سۇراقتارىنا جاۋاپ بەرەدى. ارينە، مۇمتاز شىن مانىندە ميفتىك جاراتىلىس ەمەس. ول - ادامنىڭ وپتيكالىق يلليۋزياسى عانا. وسىعان دەيىن مۇمتاز ءرولىن بىرنەشە ادام سومداعان. ءرول ءۇشىن ءارقاشان ەر ادام تاڭدالادى، ويتكەنى حايۋاناتتار باعىنىڭ ديرەكتورى موحامماد فاحيم حاننىڭ ايتۋىنشا، ەر ادامدار قىسىم مەن جاعىمسىز پىكىرلەرگە جاقسىراق جاۋاپ بەرەدى. بۇل جۇمىسقا ۇمىتكەردى اكتەرلىك قابىلەتى مەن ءارتۇرلى تىلدەردى مەڭگەرگەنىنە قاراپ ىرىكتەيدى.
مۇمتاز بەگىمدى سومدايتىن قازىرگى اكتەر - 33 جاستاعى مۋراد ءالي. ول ءرولدى 16 جىل بۇرىن اكەسىنەن مۇرا ەتىپ العان. سودان بەرى كۇن سايىن ماكياج جاساپ، كۇنىنە 12 ساعات تۇلكى وبرازىن سومدايدى.
«مۇندا كەلگەندەر قۋانىپ كەتەدى. ولاردىڭ باقىتتى ءجۇزى مەنى دە باقىتتى ەتەدى. مەنىڭ جانە ولاردىڭ اراسىندا ماحابباتقا تولى بايلانىس بار. ءومىر تىم قىسقا جانە ونى كۇلىمسىرەۋمەن وتكىزۋ كەرەك»، - دەيدى كەيىپكەر.
مۇمتاز بەگۋم جەرگىلىكتى جەردە تانىمال بولعانى سونشالىق، ونىڭ ءوزىنىڭ تابىنۋشىلارى بار. ستۋدەنتتەر وعان ەمتيحان ناتيجەلەرىن ءبىلۋ ءۇشىن ءجيى كەلەدى. الاڭداپ، قىزىنىڭ قاشان تۇرمىسقا شىعاتىنىن سۇرايتىن اتا-انالار دا بار. ادامدار وعان تاعدىرلارى تۋرالى ءتۇرلى سۇراق قويىپ، جاۋاپ الادى.
