توقايەۆ پەن ماكروننىڭ ورتاسىنداعى قازاق قىزى كىم
استانا . KAZINFORM -قازاقستان پرەزيدەنتى قاسىم- جومارت توقايەۆتىڭ فرانتسياعا ساپارى كەزىندە ەكى ەل پرەزيدەنتتىڭ ورتاسىندا تۇرعان قازاق قىزىنىڭ فوتوسى تارادى.
سۋرەتتەگى قانداسىمىز - ەسىم ماحمۇت قىزى - وتكەن عاسىردىڭ قىرقىنشى جىلداردىڭ سوڭىندا قىتايدان بوسىپ، تۇركياعا جەتكەن قازاقتاردىڭ ۇرپاعى. 1991 -جىلى پاريجدە دۇنيەگە كەلگەن. ونىڭ اكە- شەشەسى تۇركيادا تۇرىپ، كەيىن فرانتسياعا كوشكەن. كەيىن اكەسى ماحمۇت ساۆاشتىڭ جۇمىس بابى بويىنشا وتباسى فرانسيانىڭ سولتۇستىگىندەگى كرەي قالاسىنا قونىس اۋدارادى. ەشىم وسى جەردە ءوسىپ، 2020 -جىلى قالا مەرىنىڭ ورىنباسارى بولىپ سايلانعان.
«شىعىس قازاقستاننىڭ زايسان وڭىرىندە دۇنيەگە كەلگەن زۋقا باتىر اتامىزدىڭ شوبەرەسى، فرانسيانىڭ كرەي قالاسى اكىمىنىڭ ورىنباسارى جيەنىمىز ەسىم ساۆاش ماحمۇت قىزى قازاقستان پرەزيدەنتى قاسىم-جومارت توقايەۆتىڭ قۇرمەتىنە ەليسەي سارايىندا فرانسيا پرەزيدەنتى ەممانيۋەل ماكرون اتىنان ۇيىمداستىرىلعان مەملەكەتتىك كەشكى قابىلداۋعا ارنايى شاقىرۋمەن قاتىستى. شەت ەلدەردەگى كۇللى قازاق بالاسىنىڭ ماقتانىشى تاۋەلسىز قازاقستان ماڭگى جاساسىن!»، - دەپ جازدى ءوزىنىڭ الەۋمەتتىك جەلىسىندە گەرمانيادا تۇراتىن قانداسىمىز ءومىرحان التىن.
ەسىم ءبىلىمى بويىنشا مۇعالىم جانە ەكونوميست. 2012 -جىلدان باستاپ قوعامدىق جۇمىستارعا بەلسەندى ارالاسا باستايدى . كەيىن، كرەي قالاسى جاستارىنىڭ كەڭەسىنە مۇشە بولىپ قابىلدانادى. بۇعا دەيىنگى سۇحباتتارىندا ايتقانداي كرەي جاستار كەڭەسى قالا بويىنشا ءتۇرلى جوبانى جۇزەگە اسىرۋ ءۇشىن 15-21 جاس ارالىعىنداعى جاستارعا ارناپ فورۋمدار وتكىزگەن.
«2014 -جىلى مۋنيتسيپيالدىق كەڭەسكە سايلانعان كەزدە مەن حالىقارالىق قاتىناستارمەن اينالىستىم. ايتا كەتۋ كەرەك، كرەي قالاسى الەمنىڭ 12 قالاسىمەن تىعىز بايلانىس ورناتقان. ءبىز - كرەيدەگى جالعىز قازاق وتباسىمىز. سوندىقتان قازاقستانمەن بايلانىسىمىزدى نىعايتساق، جاقسى بولار ەدى. مەن وسىعان دەيىن الەمنىڭ ءبىرقاتار قالاسىمەن، سونىڭ ىشىندە تۇركيانىڭ كۋشاداسى قالاسىمەن دە بايلانىس ورناتتىم. قازاقستاننىڭ ءبىر قالاسىمەن بايلانىس ورناتسام، مەن ءۇشىن ابىروي بولار ەدى»، - دەگەن ەدى ءبىر سۇحباتىندا.
كرەي قالاسى - و- دە- فرانس ايماعىنا، سانليس وكرۋگىنە جاتاتىن، فرانسيانىڭ سولتۇستىگىندەگى قالا.
ايتا كەتسەك زۋقا باتىر ءسابيت ۇلى - ХIХ عاسىردىڭ سوڭى مەن ⅩⅩ عاسىردىڭ باسىندا ەل- جەرىمەن بوتەن جۇرتتىڭ بوداندىق ەزگىسىندە قالىپ قويعان قازاقتاردى اۋمالى- توكپەلى زاماننىڭ الۋان ءتۇرلى اپاتىنان قورعاعان تۇلعا.
زۋقا باتىر 1866 -جىلى زايساننىڭ كەندىرلىك وڭىرىندە ءبىلىمدى وتباسىندا دۇنيەگە كەلگەن ونىڭ اكەسى شىعىس قازاقستاندا اسا تانىمال بولعان ءسابيت داموللا.
ريزابەك نۇسىپبەك ۇلى
