زەلەنسكي پۋتيننىڭ ءۇش كۇندىك بىتىمگەرشىلىك تۋرالى ۇسىنىسىنان باس تارتتى

استانا. KAZINFORM - ۆلاديمير زەلەنسكي ۆلاديمير پۋتيننىڭ 7-9 مامىر ارالىعىندا ءۇش كۇندىك اتىستى توقتاتۋ تۋرالى ۇسىنىسىن قابىلدامادى. بۇل تۋرالى ۋكراينا پرەزيدەنتى جۋرناليستەرمەن وتكەن باسپا ءسوز ءماسليحاتىندا مالىمدەدى، دەپ حابارلايدى Kazinform Euronews ارناسىنا سىلتەمە جاساپ.

زەلەنسكي كەم دەگەندە 30 كۇندىك اتىستى توقتاتۋدى جاريالاۋدى ۇسىندى.

- شارتسىز اتىستى توقتاتۋ - امەريكالىقتار ۇسىنعان ۇلگى. ءبىز ونىمەن ءجۇرىپ كەلەمىز. ءيا، 30 كۇندىك اتىستى توقتاتۋ تۋرالى بىتىمگەرشىلىكتى جاساپ كورەلىك. ويتكەنى ءۇش، بەس، جەتى كۇندە ەشتەڭەگە ۇلگەرۋ، كەلىسۋ مۇمكىن ەمەس، - دەدى ۆلاديمير زەلەنسكي.

ەسكە سالا كەتەيىك، بۇعان دەيىن ۋكراينا پرەزيدەنتى ۆلاديمير زەلەنسكي كيەۆتىڭ اتىستى توقتاتۋعا دايىن ەكەنىن ايتقانىن جازعان ەدىك.