زەلەنسكي ترامپپەن سويلەسكەنىن ايتتى
استانا. KAZINFORM - ۋكراينا پرەزيدەنتى ۆلاديمير زەلەنسكي بەيسەنبى كەشكىسىن ا ق ش پرەزيدەنتى دونالد ترامپپەن سويلەسكەنىن حابارلادى. بۇل جونىندە BBC جازدى.
- پرەزيدەنت ترامپپەن جاقسى اڭگىمە وتكىزدىك. حالىقتارىمىزدى ەۋروپاداعى جەڭىس كۇنىمەن - ناتسيزمگە قارسى جەڭىسپەن قۇتتىقتادىق. جوعارعى رادا ەكونوميكالىق ارىپتەستىك تۋرالى كەلىسىمدى راتيفيكاتسيالاعانىن دا اتاپ وتتىك. بۇل - شىنىمەن تاريحي قۇجات، ول ىنتىماقتاستىق ءۇشىن كوپتەگەن جاڭا مۇمكىندىكتەرگە جول اشادى، - دەپ جازدى زەلەنسكي Telegram پاراقشاسىندا.
ۋكراينا باسشىسىنىڭ ايتۋىنشا، ا ق ش پرەزيدەنتى مايدانداعى جاعدايعا قىزىعۋشىلىق تانىتقان.
- ترامپ سوعىس الاڭىنداعى جاعداي تۋرالى سۇرادى، مەن ونى قىسقاشا اقپاراتتاندىردىم. سونىمەن قاتار، ۋكراينا بىتىمگە كەلۋگە دايىن ەكەنىن جەتكىزدىم - ءبىز ءتىپتى بۇگىننەن باستاپ 30 كۇندىك اتىستى توقتاتۋعا ءازىرمىز. ەندى رەسەيدەن وسى ۇسىنىستى قولداۋدى كۇتەمىز. سونداي-اق ۋكراينا كەز كەلگەن فورماتتا كەلىسسوزدەرگە دايىن ەكەنىن راستادىم. ءبىراق بۇل ءۇشىن رەسەي سوعىستى اياقتاۋعا نيەتتى ەكەنىن دالەلدەپ، اتىستى تولىق ءارى ءسوزسىز توقتاتۋدان باستاۋى ءتيىس، - دەدى زەلەنسكي.
ايتا كەتەيىك، بۇعان دەيىن دونالد ترامپ ۋكراينا مەن رەسەيگە 30 كۇنگە اتىستى توقتاتۋدى ۇسىنعان بولاتىن
