زايسان، كاتونقاراعاي، كەندىرلى اۋەجايلارىنا قاتىنايتىن ۇشاقتار ساتىپ الىنباق
استانا. KAZINFORM — پاريجدە (فرانسيا) ي ك ا و ەۋروپالىق جانە سولتۇستىك اتلانتيكالىق بيۋروسىنىڭ (EURNAT- DGCA) ازاماتتىق اۆياتسيا باس ديرەكتورلارىنىڭ كەڭەسىندە ق ر كولىك مينيسترلىگى ازاماتتىق اۆياتسيا كوميتەتىنىڭ ءتوراعاسى سالتانات تومپيەۆانىڭ ATR ەۋروپا مەن ورتالىق ازياداعى ساتۋ جونىندەگى ۆيتسە-پرەزيدەنتى جەروم گابوريمەن كەزدەسۋى ءوتتى.
بۇل تۋرالى كولىك مينيسترلىگى ءمالىم ەتتى.
كەزدەسۋ بارىسىندا تاراپتار وڭىرلىك اۋەپاركتى جاڭارتۋ سالاسىنداعى ىنتىماقتاستى، ATR زاماناۋي ءتۋربوۆينتتى اۋە كەمەلەرىن جەتكىزۋ مۇمكىندىكتەرىن، سونداي-اق تەحنيكالىق قىزمەت كورسەتۋ، پەرسونالدى وقىتۋ ماسەلەلەرى تالقىلاندى. سكات اۋە كومپانياسى بۇل ۇشاقتاردى قۇرىلىسى ءجۇرىپ جاتقان ءۇش جاڭا زايسان، كاتونقاراعاي، كەندىرلى اۋەجايلارىنا رەيستەردى ورىنداۋ ءۇشىن ساتىپ الۋدى قاراستىرادى.
سونداي-اق كەزدەسۋدە تۇراقتى دامۋ جانە وتىن تيىمدىلىگىن ارتتىرۋعا جانە كومىرتەگى ءىزىن ازايتۋعا باعىتتالعان يننوۆاتسيالىق تەحنولوگيالاردى ەنگىزۋ تاقىرىبىنا ەرەكشە نازار اۋدارىلدى. كەزدەسۋ سوڭىندا تاراپتار ەلىمىزدىڭ اۆياتسيا سالاسىن ودان ءارى دامىتۋ اياسىندا بىرلەسە جۇمىستانۋعا نيەت ءبىلدىردى.
- 1981 -جىلى قۇرىلعان ATR فرانسۋز- يتالياندىق اۆياتسيالىق تەحنيكا ءوندىرۋشىسى. شتاب-پاتەرى تۋلۋزادا (فرانسيا) ورنالاسقان. ATR42 جانە ATR72 تۋربوۆينتتى ايماقتىق جولاۋشىلار ۇشاقتارىن شىعارادى. كومپانيا ايماقتىق تۋربوۆينتتى ۇشاقتاردى (40 تان 74 - ورىنعا دەيىن) وندىرۋدە كوشباسشى.
