زايسان اۋدانىنىڭ تۇرعىندارى جول جاعدايىنا شاعىمداندى
وسكەمەن. KAZINFORM - شىعىس قازاقستان وبلىسى زايسان اۋدانىنىڭ تۇرعىندارىن جولدىڭ مۇشكىلدىگى ابدەن قاجىتقان. اسىرەسە كوكتەم-كۇز ايلارىندا كولىكتەر بالشىققا باتىپ قالىپ، اۋىلداردان زايسان قالاسىنا جەتۋ تىپتەن قيىندايدى. Kazinform ءتىلشىسى ماسەلەنىڭ مانىسىنە ءۇڭىلىپ كوردى.
جەرگىلىكتى حالىقتى جاعدايى سىن كوتەرمەيتىن ءبىرجان- اقارال جولى شارشاتقان.
- قىس كەتىپ، قار ەرىگەندە جانە جىلاۋىق كۇزدە جول بالشىققا اينالادى. سونىڭ سالدارىنان اۋىلداردان زايسان قالاسىنا جەتە الماي، سەرگەلدەڭگە تۇسەمىز. بىردە ءتىپتى تۇرعىنداردىڭ ءبىرى جەدەل جاردەم شاقىرتقاندا ولار جەتە الماي قالعان. وسى ماسەلەنى اكىمدىككە تالاي جىلدان بەرى ايتىپ كەلەمىز. الايدا «باياعى جارتاس - سول جارتاس» بولىپ تۇر، - دەيدى زايساندىقتار.
Kazinform ءتىلشىسى زايسان اۋدانىنىڭ اكىمدىگىنە رەسمي ساۋالحات جولداپ، جولدىڭ جوندەلەتىندىگىن- جوندەلمەيتىندىگىن ناقتى سۇراپ كوردى.
- اتالعان تاسجول اۋداندىق تۇرعىن ءۇي-كوممۋنالدىق شارۋاشىلىعى، جولاۋشى كولىگى جانە اۆتوموبيل جولدارى ءبولىمىنىڭ بالانسىندا. جالپى ءبىرجان اۋىلىنان اقارال اۋىلىنا دەيىنگى قاشىقتىق 12 شاقىرىمدى قۇرايدى. جول جازعى كۇتىپ-ۇستاۋ جۇمىستارى اياسىندا نورماتيۆتىك قالىپتا ۇستالۋدا. ال ورتاشا جوندەۋ جۇمىستارىن جۇرگىزۋ 2025 -جىلعا جوسپارلانىپ وتىر. تۇرعىندار تاراپىنان دا قالپىنا كەلتىرۋ جونىندە ۇسىنىستار كەلىپ ءتۇستى، - دەپ جاۋاپ بەردى اۋدان اكىمىنىڭ ورىنباسارى دانيار سەرىكوۆ.
ونىڭ ايتۋىنشا، بيىل تاسباستاۋ اۋىلىنداعى كوشە 61,7 ميلليون تەڭگەگە ورتاشا جوندەۋدەن وتەدى. اينابۇلاق اۋىلدىق وكرۋگىندەگى 9 كوشەنى دە ورتاشا جوندەۋدەن وتكىزۋ جوسپارلانىپ وتىر.
- جوبا سوماسى - 210 ميلليون تەڭگە. ءبىرجان اۋىلىنىڭ 19-مامىر، 8-شارتتى، امانگەلدى، 4-شارتتى كوشەلەرىن ورتاشا جوندەۋ جوباسى قولعا الىنادى. جالپى ۇزىندىعى - 1,806 شاقىرىم. جوبا سوماسى 80 ميلليون تەڭگەنى قۇرايدى. دايىر اۋىلىنداعى اباي كوشەسى 58 ميلليون تەڭگەگە ورتاشا جوندەۋدەن وتەدى. سونداي-اق كوكجىرا اۋىلىنىڭ ەكى كوشەسىنە ورتاشا جوندەۋ جۇرگىزىلەدى. قارابۇلاق اۋىلىنداعى اباي كوشەسىن ورتاشا جوندەۋ ءۇشىن 69,6 ميلليون تەڭگە كوزدەلگەن، - دەدى دانيار سەرىكوۆ.
سونداي- اق وسى جىلى اۋداندىق ماڭىزى بار «زايسان- جاڭاتۇرمىس- ءشۇرشىت سۋ» (0-12- شاقىرىم) تاسجولىندا ورتاشا جوندەۋ جۇمىستارى جۇرگىزىلەدى.
اۆتور
تالعاتجان مۇحامەتبەك ۇلى
