زاڭسىز يەمدەنىلگەن 610 ميلليارد تەڭگە مەملەكەتكە قايتارىلدى - كوميسسيا
استانا. KAZINFORM - پرەمەر-مينيستر ولجاس بەكتەنوۆ زاڭسىز يەمدەنىلگەن اكتيۆتەردى مەملەكەتكە قايتارۋ جونىندەگى كوميسسيانىڭ كەزەكتى وتىرىسىن وتكىزدى، دەپ حابارلايدى ۇكىمەتتىڭ باسپا ءسوز قىزمەتى.
بۇعان دەيىن قابىلدانعان شەشىمدەردىڭ ورىندالۋ ناتيجەلەرى قارالىپ، قايتارىلعان اكتيۆتەردى باسقارۋ كومپانياسىنىڭ جۇمىسى تۋرالى ەسەپ تىڭدالدى.
شامامەن 610 ميلليارد تەڭگەنىڭ اكتيۆتەرى، اتاپ ايتقاندا، 506 ميلليارد تەڭگە كولەمىندە اقشالاي قاراجات، سونداي-اق قۇنى 103 ميلليارد تەڭگەدەن استام مۇلىك قايتارىلدى. ارناۋلى مەملەكەتتىك قوردان ءبىلىم بەرۋ، دەنساۋلىق ساقتاۋ، سپورت، الەۋمەتتىك قامسىزداندىرۋ سالالارىنداعى 280 الەۋمەتتىك نىساندى جۇزەگە اسىرۋعا، سونداي-اق كوممۋنالدىق ينفراقۇرىلىمدى جاڭعىرتۋعا قاراجات ءبولىندى.
كەزەكتى وتىرىس قورىتىندىسى بويىنشا كوميسسيا زاڭسىز يەمدەنىلگەن اكتيۆتەردى مەملەكەتكە ەرىكتى تۇردە قايتارۋ تۋرالى ءبىرقاتار كەلىسىم جاساۋدى ماقۇلدادى. ارناۋلى مەملەكەتتىك قورعا قوسىمشا 150 ميلليارد تەڭگە باعىتتالادى. سونىمەن قاتار «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭ سۋبەكتىلەرى قازاقستان ەكونوميكاسىنا $10,5 ميلليارد ينۆەستيتسيا سالۋ بويىنشا مىندەتتەمە الدى.
سونىمەن قاتار كوميسسيا «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» ق ر زاڭىنىڭ كۇشى قولدانىلاتىن تۇلعالارعا قاتىستى جالپى سوماسى 84 ميلليارد تەڭگەدەن استام اكتيۆتەردى مەملەكەت كىرىسىنە اينالدىرۋ تۋرالى سوتقا تالاپ-ارىز بەرۋدى قولدادى.
وسىعان دەيىن كەيىنگى ءۇش جىلدا ەلگە 1,12 تريلليون تەڭگە زاڭسىز اكتيۆتەر قايتارىلعانى تۋرالى جازدىق.
