زاڭسىز قارۋ اينالىمىمەن كۇرەس باعىتىندا قانداي جۇمىس ىستەلىپ جاتىر
استانا. KAZINFORM - جىل باسىنان بەرى ءىىم- مەن بىرلەسىپ 15 قىلمىستىق توپتىڭ قىزمەتى توقتاتىلىپ، 218 مۇشەسى ۇستالىپ، 73 ادام قاماۋعا الىنعان. بۇل تۋرالى ۇ ق ك ءتوراعاسى ەرمەك ساعىمبايەۆ Kazinform اگەنتتىگىنە ەكسكليۋزيۆتى سۇحباتىندا اتاپ ءوتتى.
پرەزيدەنت قۇقىق قورعاۋ ورگاندارىنىڭ كەڭەيتىلگەن القا وتىرىسىندا ايتقانىنداي، كۇشتىك بلوك جۇمىسىنىڭ باستى قاعيداتى - «زاڭ مەن ءتارتىپ». ءبىزدىڭ نەگىزگى ماقساتىمىز قوعامدى ترانسۇلتتىق قىلمىس پەن ەسىرتكى بيزنەسىنەن بارىنشا قورعاۋ.
- جىل باسىنان بەرى ءىىم- مەن بىرلەسىپ 15 قىلمىستىق توپتىڭ قىزمەتى توقتاتىلىپ، 218 مۇشەسى ۇستالدى، 73 ادام قاماۋعا الىندى.
مىسالى، ماۋسىم ايىندا ورال قالاسىندا كاسىپكەرلەردەن اقشا بوپسالاعان قىلمىستىق توپ ارەكەتى اشكەرەلەندى. 8 ازامات ۇستالىپ، ەكەۋى سوت سانكتسياسىمەن قاماۋعا الىندى. ءقازىر الدىن الا تەرگەۋ ءجۇرىپ جاتىر.
سونىمەن قاتار، پوليتسيا جانە پروكۋراتۋرا ورگاندارىمەن بىرلەسىپ، 351 اتىس قارۋى، 57 گراناتا جانە 5,5 مىڭنان استام وق-ءدارى تاركىلەندى. بۇلار «قاڭتار وقيعاسى» كەزىندە ۇرلانعان ارسەنالدىڭ ءبىر بولىگى. وسىلايشا قارۋدىڭ دەسترۋكتيۆتى ورتاعا جەتكىزىلۋى جانە ونى قوعام مەن مەملەكەتكە قارسى قولدانۋ قاۋپى جويىلدى.
ترانسۇلتتىق قۇرىلىمدار تاراپىنان ەلگە باعىتتالعان بەلسەندى ەسىرتكى ەكسپانسياسى بايقالۋدا. بۇل - ۇلت دەنساۋلىعىنا تونگەن تىكەلەي قاۋىپ ءارى ۇلتتىق قاۋىپسىزدىككە زيان تيگىزەتىن ارەكەت، - دەدى ول.
ناركوبيزنەسپەن كۇرەس ءۇش نەگىزگى ەلەمەنتكە بايلانىستى: حالىقارالىق ەسىرتكى ترافيگى، پسيحوتروپتىق زاتتاردى ءوندىرۋ مەن تاراتۋ، سونداي-اق كاننابيس نەگىزىندەگى زاڭسىز ءوندىرىستىڭ وزىندىك شيكىزات بازاسى بار.
- وسى باعىتتا قابىلدانعان شارالار ناتيجەسىندە 13 ەسىرتكى زەرتحاناسى جويىلىپ، 29 حالىقارالىق جانە وڭىرلىك ەسىرتكى ارناسى انىقتالدى.
ماسەلەن، بيىل مامىر ايىندا قازاقستان مەن وزبەكستان قاۋىپسىزدىك قىزمەتتەرى بىرىگىپ، ازيا ەلىنەن قازاقستانعا وزبەكستان اۋماعى ارقىلى ءىرى كولەمدە اپيىن مەن گاشيش جەتكىزۋدىڭ جولىن كەستى. ترانسۇلتتىق ەسىرتكى قۇرىلىمىنىڭ 4 مۇشەسى ۇستالدى، 82 كەلى اپيىن جانە 130 كەلى گاشيش تاركىلەندى. قارا نارىقتاعى قۇنى شامامەن 2 ميلليون دوللار بولۋى مۇمكىن.
جالپى العاندا، جارتى جىل ىشىندە 3,4 توننادان استام ەسىرتكى مەن 7,5 تونناعا جۋىق پرەكۋرسور الىندى.
كورىپ وتىرعانىڭىزداي، جۇمىس اۋقىمدى، ءبىراق شەشىمىن تاپپاعان ماسەلەلەر دە جەتەرلىك. ءبىز ولاردى شەشۋگە جانە ءوز قىزمەتىمىزدى جەتىلدىرۋگە ۇمتىلىپ جاتىرمىز، - دەپ اتاپ ءوتتى ۇ ق ك ءتوراعاسى.
