زاڭسىز كىرىستەرگە جول جوق: ءماجىلىس جاڭا نورمالاردى بەكىتتى

استانا. KAZINFORM - ءماجىلىس دەپۋتاتتارى قىلمىستىق جولمەن الىنعان كىرىستەردى زاڭداستىرۋعا، تەرروريزمدى قارجىلاندىرۋعا جانە جاپپاي قىرىپ-جويۋ قارۋىن تاراتۋدى قارجىلاندىرۋعا قارسى ءىس-قيمىل ماسەلەلەرى بويىنشا زاڭ جوباسىن ەكىنشى وقىلىمدا قابىلدادى.

زاڭ جوباسى كىرىستەردىڭ ءىزىن جاسىرۋعا جانە تەرروريزمدى قارجىلاندىرۋعا قارسى ءىس-قيمىل ۇلتتىق جۇيەسىن جەتىلدىرۋ ءۇشىن، سونداي-اق اقشانى جىلىستاتۋعا قارسى كۇرەستىڭ قارجىلىق شارالارىن ازىرلەۋ توبىنىڭ حالىقارالىق ستاندارتتارىن ىسكە اسىرۋ ماقساتىندا ازىرلەندى.

زاڭ جوباسىندا مىنالار كوزدەلىپ وتىر:

- ۋاكىلەتتى ورگاندى بەكىتۋ ارقىلى قارجىلىق مونيتورينگتىڭ جاڭا سۋبەكتىلەرىن ەنگىزۋ (قارجىلىق قۇرالدارمەن مامىلەلەر بويىنشا كليرينگ قىزمەتىن كورسەتەتىن ۇيىمدار، ءوز قىزمەتىن تاۋار بيرجاسىندا جۇزەگە اسىراتىن جانە بيرجالىق تاۋارلارمەن مامىلە جاسايتىن بيرجالىق بروكەرلەر، ۇيالى بايلانىس وپەراتورلارى، «ازاماتتارعا ارنالعان ۇكىمەت» كورپوراتسياسى)؛

- قارجىلىق مونيتورينگ سۋبەكتىلەرى ءۇشىن كۇدىكتى قىزمەت تۋرالى حابارلاردى ۋاكىلەتتى ورگانعا جىبەرۋ جونىندە مىندەتتەر ەنگىزۋ.

بۇدان باسقا، كىرىستەردىڭ ءىزىن جاسىرۋ جانە تەرروريزمدى قارجىلاندىرۋ سىن-قاتەرىن باعالاۋ جۇيەسىن 2 دەڭگەيگە ءبولۋ ۇسىنىلادى - قارجىلىق مونيتورينگ جونىندەگى ۋاكىلەتتى ورگان جۇرگىزەتىن ۇلتتىق باعالاۋ جانە ۋاكىلەتتى ورگانمەن كەلىسىلگەن ادىستەرمەن ءوز قۇزىرەتى شەگىندە قارجىلىق مونيتورينگ سۋبەكتىلەرىنىڭ زاڭنامانى ساقتاۋىن باقىلايتىن مەملەكەتتىك ورگاندار جۇرگىزەتىن سەكتورلىق باعالاۋ.

زاڭ جوباسىن تالقىلاۋ كەزىندە دەپۋتاتتار ەكىنشى وقىلىمعا ءبىرقاتار نورما قابىلدادى:

— مادەني قۇندىلىقتاردى قولما-قول اقشالاي ساتىپ الۋ (ساتۋ)، مادەني قۇندىلىقتاردى قازاقستان رەسپۋبليكاسىنا اكەلۋ نەمەسە قازاقستان رەسپۋبليكاسىنان اكەتۋ وپەراتسيالارى بويىنشا شەكتى 45 ميلليون تەڭگەدەن 1 ميلليون تەڭگەگە دەيىن تومەندەتۋگە؛

— سوماسى 5 ميلليون تەڭگەگە تەڭ نەمەسە ودان اساتىن، قارجىلىق مونيتورينگكە جاتاتىن سيفرلىق اكتيۆتەرمەن جاسالاتىن وپەراتسيالار ءۇشىن شەكتى بەلگىلەۋگە؛

— قارجىلىق مونيتورينگ جونىندەگى ۋاكىلەتتى ورگاننىڭ كوممەرتسيالىق ەمەس ۇيىمداردىڭ كىرىستەردى زاڭداستىرۋ (جىلىستاتۋ)، تەرروريزمدى قارجىلاندىرۋ جانە جاپپاي قىرىپ-جويۋ قارۋىن تاراتۋدى قارجىلاندىرۋ قاۋپىن انىقتاۋ تۇرعىسىنان كۇدىكتى وپەراتسيالارىنا تالداۋ جانە مونيتورينگ جۇرگىزۋىنە؛

— قارجى مەكەمەسىنىڭ باسشىسى لاۋازىمىنا ۇمىتكەر كانديداتتىڭ ءىس-ارەكەتتەرى بۇرىن قىلمىستىق كىرىستەردى جىلىستاتۋعا، تەرروريزمدى قارجىلاندىرۋعا جانە جاپپاي قىرىپ-جويۋ قارۋىن تاراتۋدى قارجىلاندىرۋعا ىقپال ەتكەن ادامدارمەن بايلانىسىنىڭ بولۋىن مىندەتتى تەكسەرۋدى ەنگىزۋگە؛

— مەنشىك يەسى - زاڭدى تۇلعادا قىلمىستىق جولمەن الىنعان كىرىستەردى جىلىستاتۋ، تەرروريزمدى قارجىلاندىرۋ جانە جاپپاي قىرىپ-جويۋ قارۋىن تاراتۋدى قارجىلاندىرۋ سالاسىنداعى قىلمىستارى ءۇشىن الىنباعان نەمەسە وتەلمەگەن سوتتىلىعىنىڭ بولماۋى بويىنشا تالاپ ەنگىزۋگە؛

— «جاپپاي قىرىپ-جويۋ قارۋىن قارجىلاندىرۋ» ۇعىمىن ەنگىزۋگە؛

— الەۋمەتتىك مەديتسينالىق ساقتاندىرۋ قورىن قارجىلىق مونيتورينگكە جاتاتىن سۋبەكتىلەر تىزبەسىنە ەنگىزۋگە؛

— كولەڭكەلى بانكتەر قۇرۋعا تىيىم سالۋدى ەنگىزۋگە؛

— قارجىلىق مونيتورينگ سۋبەكتىلەرىنە تيىسىنشە تەكسەرۋ راسىمدەرىن جۇرگىزۋ كەزىندە سكورينگتىك جۇيەنى ەنگىزۋگە؛

— قارجىلىق مونيتورينگ سۋبەكتىلەرىنە قاشىقتان مونيتورينگتەۋدى ەنگىزۋگە؛

— مەملەكەتتىك ورگاندار ءۇشىن قىلمىستىق جولمەن الىنعان كىرىستەردى زاڭداستىرۋ (جىلىستاتۋ)، تەرروريزمدى قارجىلاندىرۋ جانە جاپپاي قىرىپ-جويۋ قارۋىن تاراتۋدى قارجىلاندىرۋ قاۋپىنە ءۇش جىلدا ءبىر رەت سەكتورلىق باعالاۋ جۇرگىزۋ مىندەتتەرىن ەنگىزۋگە قاتىستى نورمالار.

ايتا كەتەيىك، بۇگىن ماجىلىستە «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى راتيفيكاتسيالاۋ تۋرالى» زاڭ جوباسى قىزۋ تالقىلاندى.

قازاقستان مىڭنان استام شالعاي اۋىلدارىنا تالشىقتى-وپتيكالىق بايلانىس جەلىلەرى مەن كەڭجولاقتى ينتەرنەت تارتۋ ءۇشىن حالىقارالىق قايتا قۇرۋ جانە دامۋ بانكىنەن 84 ميلليارد تەڭگە قارىز الاتىن بولدى.

اۆتور

ايجان سەرىكجان قىزى