ۇزاق ۋاقىت بويى دالاعا شىقپاساڭىز نە بولادى؟
تازا اۋادا سەرۋەندەۋگە ۇزاق ۋاقىت بويى شىقپاۋ يممۋندى جۇيە جۇمىسىنا جاعىمسىز اسەر ەتەدى. ال ول ءجيى تۇماۋراتۋعا اكەلەدى.
بۇل جايلى دارىگەر سۆەتلانا ۆوروجبيت Gazeta عا ايتىپ بەردى.
ماماننىڭ ايتۋىنشا، تازا اۋادا سەرۋەندەمەۋ جالپى حال-جاعدايعا جاعىمسىز اسەر ەتىپ قانا قويماي، سونداي-اق ۇيقىنىڭ ناشارلاۋىنا اكەلەدى.
تازا اۋادا ءجۇرۋ سەكىلدى جەڭىل فيزيكالىق جۇكتەمەنىڭ ارقاسىندا ءبىراز اۋرۋدىڭ دامۋ قاۋپىن الدىن الۋعا بولادى: سەمىزدىك، قانت ديابەتى جانە ت. ب. ءجۇرۋ جۇرەك پەن قان تامىرلار جاعدايىنا جانە تىنىس الۋ جۇيەسىنە جاعىمدى اسەر ەتەدى، اسقورىتۋ جولىنىڭ قىزمەتىنە ىنتالاندىرۋشى اسەر بەرەدى، ءومىر ۇزاقتىعى مەن ساپاسىن جاقسارتادى.
«تازا اۋادا سەرۋەندەۋ - وتتەكپەن قانىعۋدىڭ، يممۋندى قورعانىس پەن كوگنيتيۆتى فۋنكتسيالاردى ىسكە قوسۋدىڭ ەڭ جاقسى ءادىسى. سەرۋەننەن سوڭ كوڭىل كۇي جاقسارادى، ادام سابىرلى بولا تۇسەدى جانە جاڭا اقپاراتتى جاقسىراق ەستە ساقتايدى. سونداي-اق ءجۇرۋ سۇيەكتەردى، بۇلشىقەتتەردى جانە بۋىنداردى قاتايتادى. جۇيەلى تۇردە سەرۋەندەۋ ومىرتقا پروبلەماسىنىڭ الدىن الادى»، - دەيدى سۆەتلانا ۆوروجبيت.
فيزيكالىق بەلسەندىلىگى از ادامدار ءۇشىن سەرۋەندەۋ وتە ماڭىزدى. ولارعا كەڭسە جۇمىسشىلارى مەن ۇيدە جۇمىس ىستەيتىن ادامدار جاتادى. سونداي-اق جۇمىسى كوزگە كۇش تۇسىرۋمەن بايلانىستى، مىسالى، كۇنى بويى كومپيۋتەر نەمەسە ۇيالى تەلەفون ەكرانىنا قارايتىن ادامدارعا دا ءجيى سەرۋەندەۋ ۇسىنىلادى.
«جاياۋ سەرۋەندەۋ قارت كىسىلەرگە، ارتىق سالماعى بار نەمەسە قانت ديابەتىمەن اۋىراتىن ادامدارعا ۇسىنىلادى. سەبەبى ءجۇرۋ كومىرسۋلى جانە ليپيدتى زات الماسۋعا جاعىمدى اسەر ەتەدى، دەنە ماسساسىن ساقتاۋعا جانە ازايتۋعا كومەكتەسەدى. بۋىن اۋرۋلارى (ارتروز، ارتريت، وستەوحوندروز) بار بولسا، ءجۇرۋ - ەڭ جاقسى جۇكتەمە ءتۇرى»، - دەيدى دارىگەر.
دارىگەر جۇيەلى تۇردە سەرۋەندەۋدى ادەتكە اينالدىرۋ ءۇشىن كۇنىنە 30 مينۋتتان باستاۋعا كەڭەس بەردى.
