زاڭ جوباسى: جەكەمەنشىك بالاباقشا سالۋعا جەر بەرۋگە تىيىم سالىنادى
استانا. KAZINFORM - بۇگىن ءماجىلىس وتىرىسىنىڭ ءبىرىنشى وقىلىمىندا مەكتەپكە دەيىنگى ءبىلىم بەرۋ، ياعني بالاباقشا ماسەلەسىنە قاتىستى زاڭ جوباسى قارالدى.
- زاڭ جوباسىندا مەكتەپكە دەيىنگى ءبىلىم بەرۋگە ەكى ماڭىزدى نورما قاراستىرىلعان. بىرىنشىدەن، بالاباقشا قۇرىلىسىنا ارنالعان جەر ۋچاسكەلەرىن ەگجەي-تەگجەيلى جوسپارلاۋدا جەر ءبولۋ جانە ولاردى جەكە مەنشىككە بەرۋگە تىيىم سالۋ ۇسىنىلادى. بۇل شارا بالاباقشالارعا ارنالعان جەرلەردى ساقتاپ، مەكتەپكە دەيىنگى ءبىلىم بەرۋدىڭ قولجەتىمدىلىگىن قامتاماسىز ەتۋگە باعىتتالعان، - دەدى ءماجىلىس دەپۋتاتى اسحات ايماعامبەتوۆ زاڭ جوباسىن تانىستىرا وتىرىپ.
سونداي-اق زاڭ جوباسىندا 6 جاسقا تولعان بالالاردى مەكتەپكە بارعانشا بالاباقشادا قالدىرۋ ماسەلەسى قارالىپ وتىر.
- قازىر اتا-انالار ءجيى كەزدەسەتىن ماسەلەنىڭ ءبىرى - بالالارىنىڭ 6 جاسقا تولعاننان كەيىن، ءبىراق وقۋ جىلى باستالعانعا دەيىن بالاباقشادان شىعارىلۋى. بۇل ءوز كەزەگىندە اتا-انالار ءۇشىن ۇلكەن قيىندىقتار تۋدىرادى، ويتكەنى ولار بالا كۇتىمىن ۇيىمداستىرۋ ماسەلەسىمەن بەتپە-بەت كەلەدى. مىسالى، ەگەر بالا جىلدىڭ باسىندا، اقپان ايىنىڭ 5 - كۇنى 6 جاسقا تولسا، ونى كەيبىر بالاباقشالار دەرەۋ شىعارىپ جىبەرەدى، ءبىراق ول بالانى مەكتەپكە ءالى بارا المايدى. وسى نورمانى ەنگىزۋ ارقىلى بالالاردىڭ بالاباقشادا جازعا دەيىن قالۋىنا مۇمكىندىك بەرىلەدى، - دەيدى ول.
ايتا كەتەيىك، بۇگىن قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت جانە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءماجىلىستىڭ ءبىرىنشى وقىلىمىندا قارالىپ جاتىر.
اتالعان زاڭ جوباسىندا جارىستاردا وزات بولعان وقۋشىلاردىڭ ۇستازدارىنا ءبىر رەتتىك سىياقى بەرۋدى زاڭداستىرۋ ماسەلەسى قارالىپ جاتىر.
سونىمەن قاتار زاڭ جوباسى اياسىندا كىتاپحانالاردا اقىلى ءىس-شارا وتكىزىپ، تابىس تابۋعا رۇقسات بەرىلمەك.
