يزرايلدىڭ يرانعا قارسى سوققى بەرۋ جوسپارى تۋرالى دەرەكتىڭ تارالۋىنا پەنتاگوننىڭ قاتىسى جوق – ا ق ش قورعانىس ءمينيسترى
استانا. KAZINFORM - ا ق ش يزرايلدىڭ يرانعا سوققى بەرۋ جوسپارى تۋرالى بارلاۋ اقپاراتى بار اسا قۇپيا قۇجاتتاردىڭ تاراپ كەتۋىنە قاتىستى تەرگەۋ جۇرگىزىپ جاتىر، دەپ حابارلايدى ت ا س س اقپارات اگەنتتىگى.
ا ق ش قورعانىس ءمينيسترى اپپاراتىنىڭ مۇشەلەرى يزرايلدىڭ يرانعا جاۋاپ سوققىسىن دايىنداۋ جوسپارى تۋرالى بارلاۋ مالىمەتتەرىنىڭ تارالۋىنا قاتىسى جوق. بۇل تۋرالى پەنتاگون باسشىسى للويد وستين مالىمدەدى.
«بۇل تەرگەۋدە قورعانىس ءمينيسترى كەڭسەسىنىڭ ەشبىر قىزمەتكەرى جوق. سوندىقتان قازىرگى ۋاقىتتا بۇل جالعان. مەن قورعانىس ءمينيسترى اپپاراتىنىڭ كەز كەلگەن مۇشەسىنىڭ بۇعان قاتىستىلىعى تۋرالى ەشقانداي دالەل نەمەسە بەلگىلەرىن كورگەن جوقپىن»، - دەدى ول شەتەلگە ساپارىندا وزىمەن بىرگە ەرگەن تىلشىلەر الدىندا سويلەگەن سوزىندە.
15-جانە 16-قازاندا «وتە قۇپيا» ساناتىنا جاتاتىن قۇجاتتار الدىمەن Middle East Spectator Telegram ارناسىندا جاريالانىپ، كەيىن ينتەرنەتتە تاراي باستادى. قۇجاتتارداعى مالىمەتتەرگە سۇيەنسەك، ولارعا اۋستراليا، ۇلى بريتانيا، كانادا، جاڭا زەلانديا جانە ا ق ش كىرەتىن «بەس كوز» اليانسىنا مۇشە ەلدەر عانا قول جەتكىزۋى كەرەك ەدى.
CNN اتاپ وتكەندەي، ا ق ش ۇلتتىق گەوكەڭىستىكتىك بارلاۋ اگەنتتىگى قۇراستىرعان قۇجاتتاردىڭ بىرىندە يزرايلدىڭ وق-دارىلەردىڭ ءبىر جەردەن ەكىنشى جەرگە جىبەرىلۋى يرانعا سوققى بەرۋگە دايىندىقتىڭ ءبىر بولىگى رەتىندە ايتىلعان.
