يزرايلدىڭ ليۆانداعى اۋە شابۋىلىنان قازا تاپقاندار سانى 2141 ادامعا جەتتى
استانا. KAZINFORM - سەيسەنبى كۇنى يزرايلدىڭ ليۆانداعى اۋە شابۋىلىنان قازا تاپقاندار سانى 22 ادامعا جەتتى، تاعى 80 ى جاراقات الدى. بۇل تۋرالى سارسەنبىدە ليۆاننىڭ دەنساۋلىق ساقتاۋ مينيسترلىگى مالىمدەدى، دەپ حابارلايدى شينحۋا اقپارات اگەنتتىگى.
ۆەدومستۆودا ناقتىلاعانداي، ەلدىڭ ءارتۇرلى پروۆينتسياسىندا قازا بولعاندار مەن جاراقات العاندار تىركەلگەن. 2023 -جىلدىڭ 8-قازانىندا يزرايل مەن «حەزبوللا» اراسىنداعى قاقتىعىس باستالعالى بەرى قۇربان بولعانداردىڭ جالپى سانى 2141 ادامعا جەتىپ، 10099 ى جاراقات العان.
ليۆان پرەمەر-ءمينيسترى نادجيب ميكاتي سارسەنبى كۇنى مالىمدەگەنىندەي، اراب ەلدەرى مەن حالىقارالىق قاۋىمداستىق يزرايلدىڭ ليۆانداعى اگرەسسياسىن توقتاتۋ ءۇشىن كۇش سالۋدى جالعاستىرۋدا. بۇل رەتتە ول ىلگەرىلەۋگە يزرايلدىڭ ىمىراسىزدىعى كەدەرگى بولىپ وتىرعانىن اتاپ ءوتتى.
«ليۆاننىڭ اراب ەلدەرى جانە باسقا مەملەكەتتەردەگى دوستارى اتىستى توقتاتۋعا قول جەتكىزۋ ءۇشىن قىسىم كورسەتۋدى جالعاستىرۋدا جانە قاجەتتى ساياسي قادامداردى تالقىلاپ جاتىر. ولاردىڭ ەڭ ماڭىزدىسى - يزرايلدىڭ ب ۇ ۇ قاۋىپسىزدىك كەڭەسىنىڭ 1701 قارارىن تولىق ورىنداۋى»، - دەپ اتاپ ءوتتى ميكاتي.
23-قىركۇيەكتەن بەرى يزرايل قارۋلى كۇشتەرى «حەزبوللامەن» قاقتىعىستىڭ كۇشەيۋى جاعدايىندا ليۆاندا «سولتۇستىكتىڭ جەبەلەرى» اتالعان اۋقىمدى اۋە وپەراتسياسىن جۇرگىزۋدە.
2023 -جىلدىڭ 8-قازانىنان باستاپ «حەزبوللا» مەن يزرايل ارمياسى ليۆان-يزرايل شەكاراسىندا سوققى الماسىپ كەلەدى. بۇل گازا سەكتورىندا حاماس پەن يزرايل اراسىندا جالعاسىپ جاتقان شايقاستاردى ەسكەرە وتىرىپ، قاقتىعىستىڭ ءورشۋ مۇمكىندىگىنە قاتىستى الاڭداۋشىلىق تۋدىرىپ وتىر.
اۆتور
زارينا تۋعانبايەۆا
