يزرايلدىڭ اۋەدەن جاساعان سوققىسىنان گازا سەكتورى ورتالىعىندا 70 ادام قازا تاپتى

  حاماس قوزعالىسى باسقاراتىن گازا دەنساۋلىق ساقتاۋ مينيسترلىگى جەكسەنبى كۇنى سەكتوردىڭ ورتالىق بولىگىندەگى ءال- ماگازي بوسقىندار لاگەرىنە يزرايل سوققى جاساپ، 70 ادام قازا تاپقانىن ءمالىم ەتتى، دەپ حابارلايدى Kazinform مەنشىكتى ءتىلشىسى.

مينيسترلىك وكىلى اشراف ال- كۋدرا وسى اۋداندا تۇراتىن ادامدار سانىن ەسكەرە وتىرىپ، قازا بولعاندار سانى ءوسۋى مۇمكىن دەپ بولجادى.

«ال- ماگازي بوسقىندار لاگەرىنە اۋەدەن سوققى جاسالعاننان كەيىن ءال- اقسا اۋرۋحاناسىنا ونداعان ادامنىڭ ءمايىتى جەتكىزىلدى»، - دەپ حابارلايدى AlJazeera.

جۇما كۇنى ب ۇ ۇ قاۋىپسىزدىك كەڭەسىنىڭ گازاعا كومەك كولەمىن ارتتىرۋ تۋرالى رەزوليۋتسياسى قابىلدانعاننان كەيىن اۋەدەن جاسالعان سوققى سانى ارتتى. ونى جەرگىلىكتى تۇرعىندار مەن پالەستينالىق ب ا ق راستاپ وتىر.

گازا دەنساۋلىق ساقتاۋ مينيسترلىگى اشرافا ال- كۋدرانىڭ سوزىنشە، سوققى سالدارىنان حالىق تىعىز ورنالاسقان كۆارتالدىڭ تاس- تالقانى شىققان.

اۋرۋحانانىڭ الدىن الا دەرەكتەرى بويىنشا، قازا تاپقان 68 ادامنىڭ قاتارىندا 12 ايەل مەن جەتى بالا بار.

پالەستينالىق قىزىل اي قوعامى دەرەگىنشە، جەدەل جاردەم بريگاداسى مەن قۇتقارۋشىلار نەگىزگى جولدار جويىلعاندىقتان كەدەرگىلەرگە تاپ بولعان، ءتيىس ورىندارعا جەتە الماي جاتىر.

يزرايل اسكەرى ماگازيدەگى وقيعا تۋرالى اقپاراتتى قاراستىرىپ، بەيبىت تۇرعىندارعا مۇمكىندىگىنشە زالال كەلتىرمەۋگە تىرىساتىنىن ءمالىم ەتتى.

«گازاداعى حاماس لاڭكەستەرى تۋدىرعان ماسەلەلەرگە قاراماستان، ساحال حالىقارالىق قۇقىقتى، ونىڭ ىشىندە بەيبىت تۇرعىندارعا تيەتىن زياندى ازايتۋ جولىن ۇستانادى»، - دەپ مالىمدەدى يزرايل قورعانىس اسكەرى.

ساحال ال- ماگازيگە جاسالعان شابۋىلدى تەرگەپ جاتقانىن حابارلادى.

سوعىس باستالعالى يزرايل حاماس- تى ءوز بەيبىت تۇرعىنداردىڭ ولىمىنە كىنالاپ كەلەدى. ولاردىڭ پىكىرىنشە، پالەستينالىق توپ اسكەري ينفراقۇرىلىمىن ازاماتتار تۇراتىن اۋداندارعا سالىپ تاستاعان.

Associated Press اگەنتتىگى حاماس دەنساۋلىق ساقتاۋ ورگاندارى كەيىنىرەك قازا بولعاندار سانى 70 ەمەس، 68 ەكەنىن ايتتى دەپ جازدى.

دۇيسەنبىگە قاراعان ءتۇنى يزرايل ااك گازا سەكتورىنىڭ ورتالىق بولىگىنە تاعى شابۋىل ۇيىمداستىردى. سوققىلار ال- ماگازي جانە بۋرەيدج بوسقىندار لاگەرىنە باعىتتالىپ، قۇرباندار سانى ارتتى. كەيىنگى 12 ساعاتتا جۇزدەگەن ادام ولتىرىلگەنى حابارلاندى. ولاردىڭ باسىم بولىگى - ايەلدەر مەن بالالار.

7-قازاننان بەرى يزرايل شابۋىلى سالدارىنان 20400 دەن استام پالەستينالىق مەرت بولدى. 7-قازانداعى حاماس سوققىسىنان 1139 يزرايل ازاماتى قازا تاپتى.

ب ۇ ۇ حابارلاۋىنشا، گازا سەكتورىندا ەكى ميلليونعا جۋىق ادام ازىق- تۇلىك پەن سۋ جەتىسپەۋىنەن زارداپ شەگىپ وتىر. باعالاۋ بويىنشا، سۋ قورىنىڭ %96 ءى ادام تۇتىنۋعا جارامسىز. العاشقى قاجەتتىلىك زاتتارى، ونىڭ ىشىندە اۋىز سۋ مەن ءدارى- دارمەك جەتىسپەي جاتىر.

بۇعان دەيىن يزرايل بيلىگى گازا سەكتورىنىڭ وڭتۇستىگىندەگى حالىقتى دەرەۋ كوشىرۋگە بۇيىرعانى حابارلانعان بولاتىن.

سونداي- اق يزرايلدىڭ گازا سەكتورىنا سوققىلارى سالدارىنان 7 - قازاننان بەرى 20258 ادام مەرت بولدى، تاعى 53688 ءى جاراقات العانىن جازعان ەدىك.

اۆتور

زارينا تۋعانبايەۆا