يزرايلدە سوعىس جاعدايىنداعى تەرگەۋگە شەكتەۋ قويىلماق

استانا. KAZINFORM - يزرايلدە اسكەري قىزمەتكەرلەرگە قاتىستى ىستەردى تەرگەۋ بويىنشا باس پروكۋروردىڭ وكىلەتتىگىن شەكتەۋدى كوزدەيتىن زاڭ جوباسى دايىندالىپ جاتىر، دەپ حابارلايدى انادولى.

يزرايلدىڭ مەملەكەتتىك KAN تەلەارناسىنىڭ حابارلاۋىنشا، بۇل زاڭ جوباسى كەلەسى اپتادا مينيسترلەر كوميتەتىندە قارالادى.

ۇسىنىسقا سايكەس، سوعىس جاعدايىندا اسكەري قىزمەتكەرلەرگە قاتىستى تەرگەۋدى باستاۋ ءۇشىن باس پروكۋرورعا يزرايل قارۋلى كۇشتەرى باس شتابى باستىعىنىڭ رۇقساتى قاجەت بولادى.

زاڭ جوباسىن «ليكۋد» پارتياسىنىڭ دەپۋتاتى موشە ساادا ۇسىنعان، ونى 16 دەپۋتات قولداپ قول قويعان. دەگەنمەن، بۇل زاڭنىڭ كىسى ءولتىرۋ مەن جىنىستىق سيپاتتاعى قىلمىسقا قاتىستى ارەكەتتەرگە جول بەرمەيتىنى ناقتى كورسەتىلگەن.

يزرايل شەنەۋنىكتەرىنىڭ ءبىرى بۇل باستاما اسكەري قىزمەتكەرلەردى شەتەلدە قىلمىستىق قۋدالاۋدان قورعاۋ ءۇشىن قاجەت ەكەنىن مالىمدەدى.

ايتا كەتۋ كەرەك، كوپتەگەن يزرايلدىك اسكەريلەر شەتەلگە شىقپاۋعا ءماجبۇر بولعان، سەبەبى ولار گازا سەكتورىندا جاسالعان اسكەري قىلمىستارعا بايلانىستى قاماۋعا الىنۋ قاۋپىنەن قورقادى.

سونىمەن قاتار، يزرايل ارمياسى 2024 -جىلعى 23- ناۋرىزدا گازا سەكتورىنداعى رافاح قالاسىندا بولعان وقيعا سياقتى جاعدايلاردا دا، اسكەري قىزمەتكەرلەرگە قاتىستى سوت تەرگەۋىنە كەدەرگى كەلتىرۋى مۇمكىن. سول وقيعادا 15 مەديتسينا جانە ازاماتتىق قورعانىس قىزمەتكەرى قازا تاپقان بولاتىن.

اۆتور

نازىم بولەسوۆا